Pensiya artımı 1 mln 209 min 135 nəfəri əhatə edəcək

Prezident İlhm Əliyev pensiyaların baza hissəsinin 17,6% - 100 manatadək ($128) artırılmaı barədə sərəncam verib. 

Qanun sentyabrın 1-dən qüvvəyə minir. 1 sentyabr 2010-cu ildən onun həcmi 85 manat idi. Milli qəhrəmanlar, şəhid ailələri, veteranlar və əlillərin (o cümlədən müharibə və əmək) pensiyası da artırılıb.

Dövlət Sosial Müdafiə Fondunun sədri Səlim Müslümov bu günkü mətbuat konfransında bildirib ki, sərəncam 1 mln 209 min 135 nəfəri əhatə edəcək. Azərbaycanda 1 iyul 2013-cü il tarixə 1 milyon 272 min 566 pensiyaçı var. 

DSMF-nin məlumatına görə, pensiyanın baza hissəsini 100 faiz alanların (1 milyon 90 min nəfər) pensiyasının artımı 15 manat, bəzi kateqoriyaya aid olan pensiyaçılarda isə daha çox olacaq. Belə ki, pensiyanın baza hissəsini 120 faiz həcmində alanlar ((I qrup gözdən əlillər istisna olmaqla) 15 min 580 nəfər)) üzrə artım 19 manat 50 qəpik, pensiyanın baza hissəsini 200 faiz həcmində alanlar üzrə ((I qrup gözdən əlillər) 7763 nəfər)) isə 31 manat 50 qəpik təşkil edəcək. 

Milli qəhrəmanların ailə üzvlərinin pensiyasının baza hissəsi 30 manat artırılaraq 200 manata, şəhid ailəsi üzvlərinin pensiyasının baza hissəsi isə 27 manat 75 qəpik artırılaraq 185 manata çatacaq. 

Döyüşən ordunun tərkibində xidmət etmiş müharibə iştirakçılarının (Böyük Vətən müharibəsi iştirakçıları istisna olmaqla), habelə döyüş əməliyyatı aparılan ölkədə hərbi xidmət borcunu yerinə yetirmiş hərbi quluqçuların pensiyasının baza hissəsi 16 manat 50 qəpik artacaq.

Böyük Vətən Müharibəsi (BVM) iştirakçılarının pensiyasının baza hissəsi 28 manat 50 qəpik, I qrup BVM əlillərininki 37 manat 50 qəpik, II qrup BVM əlillərininki 31 manat 50 qəpik, III qrup BVM əlillərininki isə 28 manat 50 qəpik artırılacaq.

S.Müslümov qeyd edib ki, əmək pensiyalarının baza hissəsinin artımının maliyyələşdirilməsi üçün təxminən 73,2 milyon manat əlavə vəsait tələb olunur. 

DSMF sədri onu da bildirib ki, hazırda Azərbaycanda əmək pensiyalarının baza hissəsi 128 ABŞ dolları təşkil edir. Bu göstəriciyə görə, Azərbaycan MDB-də üçüncü yeri tutur. Qazaxıstanda əmək pensiyasının baza hissəsi 185 ABŞ dollar, Belarusda 129 dollardır. 

1 iyul 2011-ci ildən vahid pensiya təminatı prinsipi tətbiq edilir. Bu qaydalara əsasən (bir əmək ilinə görə 1,93 manat əmsalı) 1 yanvar 2006-cı ilə kimi pensiyaya çıxanların pensiyaları yenidən hesablanıb və 845 min nəfərin pensiyası 40% artırılıb. 

Yenilikıə bağlı DSMF 2011-ci ildə əlavə 585 mln manat xərcləyib (390 mln 1 yanvar 2010-cu ilə kimi pensiyaya çıxanlar üçün, 195 mln manat 2011-ci ilin 6 ayı üçün). --17D—