NİDA fəallarının işi üzrə istintaq yekunlaşıb

“NİDA” və “Azad gənclik” hərəkatlarının həbs edilmiş üzvlərinin işi üzrə istintaq yekunlaşıb. Vəkil Nemət Kərimlinin Turan-a verdiyi məlumata görə, istintaqın yekunlaşdığı sentyabrın 24-də elan edilib.

Onun sözlərinə görə, gənclərin vəziyyəti normaldır, hazırda onlar iş materialları ilə tanış olurlar. Vəkil qeyd edib ki, ibtidai istintaq materialalrında fəallara daha əvvəl elan edilmiş ittiham qalıb.

Xatırladaq ki, NİDA hərəkatının 7 üzvü həbsdədir.

Onların bəziləri martın 10-da əsgər ölümlərinə qarşı etiraz aksiyası ərəfəsində, digərləri isə aksiyadan sonra saxlanılıb. Onlar aksiya zamanı istifadə üçün “Molotov kokteyli” hazırlamaqda ittiham olunublar.

Onlara qarşı 234.1 (narkotik əldə etmə, saxlama və satma), 228.1 (silah və partlayıcı maddə saxlamaq, əldə etmək, daşımaq), habelə 220.1-ci (yanğın və kütləvi qarşıdurmalardan istifadə ilə kütləvi iğtişaşların təşkili) maddələrlə ittiham irəli sürülüb.

Ümumilikdə gənclər 12 ilədək azadlıqdan məhrum edilə bilər. Onlar hamısı “Amnesty İnternational” təşkilatı tərəfindən vicdan məhbusu kimi qəbul olunub. -16D04-