NİDA fəallarının işi üzrə məhkəmədə

Bakı Ağır Cinayətlər Məhkəməsində Cavid Hüseynovun sədrliyi ilə NİDA hərəkatının 7 fəalının və “Azad gənclik” hərəkatının üzvü İlkin Rüstəmzadənin işi üzrə hazırlıq iclası başlayıb.

Onlar martın 10-da Bakıda etiraz aksiyası zamanı kütləvi iğtişaşlar hazırlamaqda təqsirli bilinirlər. Öncə gənclər qanunsuz silah və narkotik maddə saxlamaqda ittiham olunublar. Mart-aprel aylarında bu ittihamla NİDA üzvləri Məmməd Əzizov, Bəxtiyar Quliyev, Şahin Novruzlu, Rəşadət  Axundov, Üzeyir Məmmədli, Rəşad Həsənov və Zaur Qurbanlı həbs olunublar.

Mayda İlkin Rüstəmzadə xuliqanlıq ittihamı üzrə həbs olunub.

Bugünki iclasda xarici səfirliklərin nümayəndələri iştirak ediblər. Vəkil Xalid Bağırov müvəkkili Zaur Qurbanlının həbs müddəti bitdiyi üçün azad edilməsi haqqında vəsatət qaldırıb.

Daha sonra digər müttəhimlərin vəkilləri də cinayət tərkibi olmadığı üçün müvəkkillərinin azad edilməsi haqqında vəsatətlə çıxış ediblər.

Müttəhim İlkin Rüstəmzadə həbsi ilə bağlı çaşqınlığını bildirib. “Məni videoçarxa (Harlem shake) görə həbs ediblərsə, onun müəllifi var, mənim nə təqsirim var?” deyə o bildirib. 

Dövlət ittihamçısı öz çıxışında vəsatətləri əsassız hesab edib və onların təmin edilməsinə etiraz edib.

Proses insidentsiz ötüşməyib: belə ki, 20 dəqiqə zalda işıq olmayıb. Bundan başqa, müttəhim İlkin Rüstəmzadənin dişi ağrıyıb, o, həkim istəyib, lakin onun xahişi təmin edilməyib. Prosesin sabah saat 10-da davam edəcəyi haqqında hakim deyil, hər zaman olduğu kimi, mühafizəçilərdən biri elan edib. -16D-