NİDA hərəkatının fəalı Məmməd Əzizov karserə salınıb

Kürdəxanı təcridxanasında saxlanılan NİDA hərəkatının fəalı Məmməd  Əzizov cərimə kamerasına (karser) salınıb. Bu barədə Turan-a hərəkatdan məlumat verilib.

Mənbənin məlumatına görə, çərşənbə günü NİDA fəalları ona yemək aparıblar. Lakin təcridxana administrasiyasından bildirilib ki, M.Əzizov karserə salınıb. Lakin onun hansı səbəbdən cəzalandırılması və cərimə kamerasına nə vaxt salınması barədə açıqlama verilməyib. 

Mayın 30-da M.Əzizovun vəkili Fariz Namazlı təcridxanaya gedərək onun cəzalandırılmasının səbəblərini araşdırmaq niyyətindədir.

Qeyd edək ki, ötən həftə M.Əzizov Milli Təhlükəsizlik Nazirliyi bə AzTV telekanalını məhkəməyə verib.

Gənc fəal onun təqsirsizlik prezumpsiyasının pozulmasının tanınmasını və ona dəyən 10 min manat həcmində mənəvi zərərin ödənməsini tələb edib.

Vəkilin sözlərinə görə, qanunsuz narkotik maddə saxlamaqda ittiham olunan M.Əzizov MTN-nin təcridxanasında mənəvi təzyiqlər altında etirafedici ifadələr verməyə məcbur edilib və dindirmə ilə bağlı videokadrlar telekanallarda, o cümlədən AzTV-də göstərilib. Gənc fəal narkoman kimi təqdim olunub.

Xatırladaq ki, martın 9-da Azərbaycan telekanalları həbs edilmiş NİDAçılar Məmməd Əzizov, Bəxtiyar Quliyev və Şahin Novruzlunun dindirilməsi ilə bağlı kadrlar göstəriblər. Bildirilib ki, gənclər 10 mart aksiyasında “Molotov kokteyli”ndən istifadə etmək və aksiya iştirakçılarına narkotik maddə paylamaq istəyirmişlər.

NIDA hərəkatı bunu hakimiyyətin siyasi opponentlərinə qarşı təxribatı adlandırıb. Nəticədə hərəkatın 4 fəalı həbs edilib.

Amnesty International həbs olunanları “vicdan məhbusları” adlandırıb.16B06—