Nikol Paşinyan İlham Əliyevlə qarşıdakı görüşünü qarabağlılarla müzakirə edəcək?

Bakı/11.03.19/Turan: Martın 12-də Qarabağda Ermənistan Təhlükəsizlik Şurasının iclası keçiriləcək. İclasda Ermənistanın baş naziri Nikol Paşinyan iştirak edəcək, Ermənistan KİV məlumat yayıb.

Müzakirələrin mövzusu açıqlanmır, lakin güman etmək olar ki, N.Paşinyan prezident İlham Əliyevlə qarşıdakı görüşü barədə məlumat verəcək və bununla bağlı qarabağlıların fikrini dinləmək istəyəcək.

Qeyd edək ki, Qarabağın qaytarılmasından imtina etmək və Azərbaycan ərazilərinin dərinliyinə hücum etməyə hazır olmaq barədə erməni rəsmi şəxslərinin son bəyanatları beynəlxalq birliyin tənqidlərinə səbəb olub və Minsk Qrupunun həmsədrləri xüsusi bəyanatla çıxış ediblər.

Bu cür bəyanatlar Ermənistanda və Qarabağda müxalifətin tənqidlərinə səbəb olub və danışıqlarda Ermənistanın mövqeyini zəiflədilməsi kimi qiymətləndirilib.

Hakim Respublika Partiyasının keçmiş sədr müavini Eduard Şarmazanov ATƏT-in Minsk Qrupunun bəyanatını Yerevana "şillə" adlandırıb.

Öz növbəsində "Qarabağ parlamenti"nin deputatı Vardqes Baqran Paşinyanı danışıqların formatını dəyişərək ora Dağlıq Qarabağı daxil etmək cəhdlərində ittiham edib.

"Mən Ermənistan baş nazirinin təklifi ilə formatın dəyişə biləcəyini gözləmirdim. Bilmirəm, kimsə buna inanırdımı? Nikol Paşinyan bildirib ki, Arsax danışıqlarda iştirak etməlidir, üstəlik format dəyişməlidir. Minsk Qrupunun bəyanatı mənim üçün gözlənilməz olmadı", - Tert.am Baqranyandan sitat gətirib. -02D-