Nikol Paşinyan Qarabağ nizamlanması haqqında

Bakı/26.07.18/Turan: Ermənistanın baş naziri Nikol Paşinyan əmindir ki, Rusiyanın Azərbaycanın müharibəyə başlamasına icazə verməmək üçün hər cür imkanı var. Bu barədə o, "Exo Moskvı" ("Moskvanın səsi") radiosuna müsahibəsində bildirib.

"Düşünürəm ki, Rusiyanın müharibəyə imkan verməmək üçün hər cür vasitəsi var və Rusiyanın müharibənin qarşısını almaq üçün bu vasitələrdən istifadə etməkdən imtina edəcəyinə inanmıram", deyə o bildirib.

Paşinyan və Əliyev arasında görüş ehtimalı haqqında suala cavabda Ermənistan baş naziri bildirib ki, Rusiya prezidenti artıq Futbol üzrə Dünya Çempionatında onları tanış edib, amma "təəssüf ki, bu tanışlıq çox da səmərəli olmadı, belə ki, İlham Əliyev NATO-nun sammitində də iştirak edib, amma biz orada salamlaşmadıq", deyə Paşinyan bildirib.

Oğlunun Qarabağda hərbi xidmətdə olmasını şərh edən Paşinyan deyib ki, oğlu oraya könüllü olaraq gedib. Çoxları bunu aqressiv jest kimi şərh edir, amma əslində hər şey əksinədir.

"Bu, sülhməramlı jestdir, çünki, düşünürəm ki, biz hamımız başa düşürük ki, oğlumu Qarabağa göndərərkən orada müharibə başlamasını və Allah qorusun, oğlumun və digər həmvətənlərimizin oğullarının, Azərbaycan oğullarının, Azərbaycanın sıravi vətəndaşlarının oğullarının ölməsini istəmirəm.

Prezident İlham Əliyev də öz oğlunu orada xidmətə göndərsəydi, şad olardım. Çünki onun oğlu da orada xidmət etsəydi, bəlkə də mən bunu sülhməramlı addım kimi qəbul edərdim, çünki hamımız əmin olardıq ki, cənab Əliyev də oğlunun orada həlak olmasını istəməz", deyə Paşinyan bildirib.

Eyni zamanda, o etiraf edib ki, Azərbaycan müharibəyə hazırlaşır və Ermənistan cavab tədbirləri görür.

Paşinyan prinsipcə Qarabağ münaqişəsinin həllinin mümkün olub-olmadığı haqqında suala təsdiqedici cavab verib, amma Ermənistan tərəfin hansı güzəştə hazır olduğunu dəqiqləşdirməkdən yayınaraq, deyib: "Bəs Azərbaycan güzəştə hazırdır?". -02D-