Novruz Məmmədov yenidən Qərbi qərəzlikdə ittiham edir

Prezident Administrasiyası rəhbərinin müavini və xarici əlaqələr şöbəsinin müdiri Novruz Məmmədov növbəti dəfə Qərbi tənqid edib.

“Azərbaycanın apardığı daxili və xarici siyasət göstərir ki, ona qarşı aparılan qərəzli yanaşmaların heç bir nəticəsi olmayacaq. Ölkəmiz heç bir dövlətin nəzarəti altında olmayıb və bundan sonra da olmayacaq”, - N.Məmmədov jurnalistlərlə söhbətində bildirib. 

Onun sözlərinə görə, “Qərb dairələri, beynəlxalq qurumlar və dövlətlər Azərbaycana qarşı qərəzli mövqe nümayiş etdirirlər”. Onun fikrincə, bu, REAL Hərəkatının icraçı katibi Natiq Cəfərlinin həbsilə  bağlı bəzi beynəlxalq qurumların verdiyi bəyanatlarda da özünü göstərir.

“Bu cür addımlar, ölkəmizin daxili işlərinə qarışmaq cəhdləri heç vaxt nəticə verməyəcək. Azərbaycana qarşı bu ikili standartlardan əl çəkmək lazımdır”, - N.Məmmədov vurğulayıb.

O, Ermənistanda son etiraz aksiyaları zamanı insan hüquqlarının kütləvi şəkildə pozulmasına görə Qərbin bu ölkəni tənqid etməməsindən şikayətlənib.

Sonra o bildirib ki, FETÖçülərın Azərbaycandakı tərəfdarlarının hamısı üzə çıxarılacaq.

“FETÖ təşkilatı bəzi dairələrdən qaynaqlanır və bununla əlaqədar Türkiyə ilə yanaşı, Azərbaycanda da araşdırmalar aparılır. Bu hadisələrin arxasında dayanan qüvvələr heç vaxt Azərbaycanı sarsıda bilməyəcəklər.

və FETÖçülərin buradakı tərəfdarlarının hamısı üzə çıxarılacaq”, - o bildirib. 

““Azərbaycanda bu məsələ ilə bağlı aparılan araşdırmalar göstərir ki, bu təşkilat birbaşa tərəfdarları ilə bərabər, ölkəmizdəki bəzi müxalifət qurumları ilə də əlaqəlidir”, - N.Məmmədov qeyd edib.

Qeyd edək  ki, Azərbaycan prezidenti İlham Əliyevin martın sonları-aprelin əvvəllərində Vaşinqtona səfərindən sonra rəsmi Bakı Qərbin ünvanına  tənqidləri yığışdırdı. Və Novruz Məmmədov Bakı  və Vaşinqton arasında strateji tərəfdaşlıqdan danışdı.

Lakin Azərbaycan, RF və İran prezidentlərinin avqustun 8-də Bakı sammitindən sonra qərbyönlü fəallara qarşı yeni repressiya dalğası başladı və bunun ardınca ABŞ və Aİ-nin ünvanına tənqidlər artdı.–06D--