Noyabrda Avropadan Azərbaycana 55 nəfər readmissiya olunub

Noyabrda Dövlət Miqrasiya Xidməti  55 nəfəri Azərbaycana readmissiya edib.

Cümə günü Dövlət Miqrasiya Xidmətinin məlumatında deyilir ki, onlar əsasən Almaniya, İsveç, Yunanıstan, Macarıstan, Çex və Fransadan readmissiya olunanlardır. Proses Azərbaycanın imzaladığı readmissiya sazişləri çərçivəsində həyata keçirilib.

Rəsmi məlumata görə, bu il (yanvar-noyabr) Azərbaycana 383 nəfər readmissiya olunub.

2014-cü ildə “Azərbaycan  ilə Avropa İttifaqı arasında icazəsiz yaşayan şəxslərin readmissiyası haqqında” saziş imzalanıb. Saziş imzalanan gündən indiyə qədər Azərbaycana 2500 nəfər readmissiya olunub və daha iki minədək şəxsin readmissiyası gözlənilir.

Ölkəyə readmissiya olunan beş siyasi fəal - Mütəllim Orucov, Malik Rzayev, Pünhan Kərimli, Cəfər Mirzəyev və Samur Aşurov narkotik maddə ittihamı ilə həbs ediliblər. Həmin şəxslərin həbsinin səbəbləri Azərbaycanda insan hüquqlarının pozulması ilə bağlı Avropada etirazlarda iştirak etmək, sosial şəbəkələrdə tənqidi yazılarla çıxış etməkdir.

Azərbaycanın hüquq- mühafizə orqanları bildirirlər ki, fəalların həbsi törətdikləri cinayət əməllərilə əlaqədardır.

Həmin fəallar yerli hüquq- müdafiə təşkilatları tərəfindən siyasi məhbuslar kimi tanınıblar.