Obamaya $ 7000 dəyərində Azərbaycan xalçası hədiyyə verilib

Çərşənbə axşamı ABŞ Federal registrində dərc olunan hədiyyələrin qeydi üzrə  Dövlət Departamentinin illik hesabatına görə, prezident Barak Obama və birinci xanım daxil olmaqla,  ABŞ-ın  yüksək vəzifəli  şəxsləri Azərbaycan rəsmilərindən bahalı hədiyyələr alıblar.Turan-ın Vaşinqton müxbiri məlumat verib.

Səfir Elin Süleymanov 2013-cü il dekabrın 5-də prezident Obamaya $ 6560 dəyərində  üzərində qırmızı, ağ və mavi həndəsi naxışlar olan  böyük Azərbaycan xalçasını bağışlayıb. Eyni zamanda Mişel Obama 435 dollar dəyərində qırmızı rəngdə Azərbaycan yaylığı  alıb. Bu barədə rəsmi hesabatlarda deyilir.

Ötən ilin dekabrında Vaşinqtonda dövlət katibi Jon Kerriyə 760 dəyərində əllə toxunmuş ipək xalça hədiyyə verilib.

Noyabrda Bakıda səfir Riçard Morninqstara qiyməti $ 625 olan ipək xalça hədiyyə olunub.

Azərbaycanın keçmiş müdafiə naziri Səfər Əbiyev avqustda Vaşinqtonda olarkən amerikalı həmkarı Çak  Heyqla $ 600 dəyərində şərab bağışlayıb.

Bundan əlavə, azərbaycanlı məmurlar ötən ilin avqustunda ABŞ-ın yüksək vəzifəli şəxslərinin  Bakıdan Parisə uçuşlarını ödəyiblər. Bu barədə rəsmi hesabatda deyilir.

Qeyd edək ki, bu sənəd noyabrın 12-də axşam Amerikanın bir neçə aparıcı məmurunun səfir E.Süleymanov və azərbaycanlı nazirin Vaşinqtondakı oğlunun təşkil etdiyi şam yeməyinə gəlişindən bir neçə saat öncə açıqlanıb.

Dəvətlilər arasında ABŞ administrasiyası, Konqres, diplomatik korpus və analitik mərkəzlərin təmsilçiləri var. Azərbaycanın gözəlliyinə həsr olunan bu təntənəli şam yeməyi ABŞ paytaxtının möhtəşəm yerlərindən birində - Andrew  W. Mellon-da olacaq.

Fəxri qonaqların arasında onlarca tanınmış şəxs var: konqresmenlər Korrin Braun, Marsiya Fudc, Maykl Fitspatrik, Stiv Koen, Kori Qardner, Cin Qrin, Billi Lonq,  senator Riçard Berr və başqaları.

Tədbirin rəsmi təşkilatçısı Azərbaycanın nəqliyyat nazirinin oğlu Anar Məmmədovun rəhbərlik etdiyi Azərbaycan-Amerika Alyansıdır. Adı çəkilən şəxslərin heç biri bu tədbirdə iştirakını şərh etməyib.

Foreign Policy jurnalının məlumatına  görə, 2012-ci ildə A.Məmmədov bu cür şam yeməyinə ən azı  $ 2 mln. xərcləyib. Mənbənin məlumatına görə, ötən il A.Məmmədovun təşkilatı ABŞ-ın rəsmi şəxsləri ilə əlaqələrin  qurulması üçün Fabiani & Co lobbi qrupuna 5 mln. dollar ödəyib.-25В-