Mehman Hüseynov: Məni ölkəmdə girov saxlayırlar

“Bakı aeroportunda sərhəd xidməti mənim pasportum barədə məlumat tapa bilmədi. Pasportumun seriya nömrəsini yazdılar, ağ vərəq çıxdı. Dedilər, belə adam yoxdur, bu pasport saxtadır. Mən deyəndə “saxta pasport nədir?”, dedilər ki, sən uyğun gəlmirsən. Dəvət etdilər otağa, başladılar üz cizgilərimin şəkillərini yoxlamağa. Bildirdim ki, pasportumda vizalar var, ölkədən çıxış və ölkəyə girişlə bağlı sərhəd xidmətinin möhürləri var. Bu, necə saxta ola bilər?” Bu barədə dünən Bakı Hava limanında saxlanan bloger Mehman Hüseynov Turan-a bildirib.

Blogerin qollarını qandallayıblar. Əvvəlcə iki saat sərhəd xidmətində, bir neçə saat Hava Nəqliyyatında Polis İdarəsində saxlandıqdan sonra Səbail rayon Polis İdarəsinin 9-cu Polis Bölməsinə gətiriblər. Oradan isə Səbail Rayon Polis İdarəsinə aparıblar və müstəntiqlər sorğu-sual edib. Nəhayət 9 saata yaxın saxlandıqdan sonra Baş Prokurorluğun Ağır Cinayətlərə dair İşlər üzrə İstintaq İdarəsinə gətirilib və orada azad buraxılıb.

Hüseynov 2012-ci ildə xuliqanlıq ittihamı ilə saxlanılıb və barəsində cinayət işi qaldırılıb. Bir gün saxlandıqdan sonra azad buraxılıb və ölkədən çıxışına qadağa qoyulub. Buna baxmayaraq, o, müstəntiqin razılığı ilə bir neçə dəfə xarici ölkələrdə beynəlxalq tədbirlərdə iştirak edib, ölkəyə qayıdıb. O, bu dəfə də ölkədən çıxmaq üçün polisə müraciət edib. Polis problemin olmadığını və prokurorluqdan da icazənin lazım olduğunu xatırladıb. Prokurorluğun müstəntiqi isə onu bir neçə gün ləngidib. Lakin sonda problem olmayacağını deyib. Buna baxmayaraq, Hüseynov hava limanında saxlanılıb.

“Dünən Səbail rayon Polis İdarəsi Sərhəd Xidmətinə rəsmi sorğu göndərdi ki, mənim ölkədən çıxışıma polis qadağa qoymayıb. Polis idarəsi bildirdi ki, bu məsələni Baş Prokurorluğun Ağır Cinayətlərə dair İşlər üzrə İstintaq İdarəsi ilə müzakirə et. Ağır Cinayətlərə dair İşlər üzrə İstintaq İdarəsinin müstəntiqi isə dedi ki, bundan sonra ölkədən çıxanda bizə də müraciət et. Bununla da məni azad buraxdılar”, deyə o qeyd edib. 

Bloger məhkəməyə müraciət edəcəyini bildirib. “Məhkəməyə müraciət edəcəyik  ki, artıq 3 ildən çoxdur cinayət işi açılıb, lakin heç bir nəticəsi yoxdur. Bu səbəbdən cinayət işi dayandırılsın və mənim qanunsuz olaraq ölkəni tərk etməyimə qoyulmuş qadağa aradan götürülsün. Eyni zamanda, dünən heç bir əsas olmadan mənim qollarımı qandallayıblar”.

O, saxlanılmasının və ölkədən çıxışına qadağa qoyulmasının bloger fəaliyyəti ilə əlaqəli olduğunu düşünür. “Çünki mənə saxlanılan və dindirilən zaman qeyri-rəsmi deyirlər ki, bu, sənə lazım idi? Bəlkə fəaliyyətindən bir az geri çəkiləsən, fəaliyyətini dəyişəsən. Bunu nəzərə alıb gələn dəfə səni ölkədən buraxarlar”.

Hüseynov, təzyiqlərə baxmayaraq, bloger fəaliyyətini davam etdirəcəyini bildirib. “Məni öz ölkəmdə girov kimi saxlayırlar. Bunlar düşünürlər ki, bu addımla mənim fəaliyyətimi dəyişdirə bilərlər. Çox yanlış yoldadırlar. Mən heç bir qeyri-qanuni fəaliyyətlə məşğul deyiləm. Ona görə də bundan sonra da fəaliyyətimi davam etdirəcəyəm”, deyə o qeyd edib. -03B-