Oqtay Gülalıyevin oğluna hücum işi prokurorluğun nəzarətinə verilib

Vətəndaş cəmiyyəti fəalı Oqtay Gülalıyevin 16 yaşlı oğlunun vəhşicəsinə döyülməsi və bıçaqlanması faktı üzrə təhqiqat Xətai rayon 37-ci polis bölməsindən Xətai Rayon Prokurorluğunun nəzarətinə verilib Bu barədə Turan-a O.Gülalıyev məlumat verib.

Xatırladaq ki, sentyabrın 23-də axşam NZS qəsəbəsindəki evlərinin yaxınlığında Əli Gülalıyevə hücum olub. 4-5 gənc 16 yaşlı gənci döyüb və iki bıçaq yarası vurublar.

Sentyabrın 26-da evə müstəntiq gəlib və Ə.Gülalıyevin ifadəsini qeydə alıb. Hücum edənlərin fotorobotlarının tərtib edilməsinə başlanılıb. 

Ə.Gülalıyevin sağlıq durumu orta ağırlıq kimi qiymətləndirilir. Yaralar qanayır, daxili orqanları ağrıyır. Lakin hələlik iş üzrə saxlanılan və şübhəli bilinən yoxdur.

O.Gülalıyev DİN nümayəndəsinin iş üzrə tələsik bəyanat verməsindən təəssüfləndiyini bildirib. Belə ki, DİN mətbuat xidmətinin şöbə müdiri Orxan Mansurzadə bildirib ki, ilkin məlumatlara görə, insidentə sentyabrın 20-də 194 saylı məktəbdə Ə.Gülalıyevlə Bayram Sultanlı arasında baş vermiş dava səbəb olub. Birinci o birinin gözünə xəsarət yetirib. Bundan sonra Sultanlının yaxınları ona yüngül xəsarət yetiriblər. 

Lakin O.Gülalıyevin sözlərinə görə, onun oğlu və B.Sultanlı arasında şəxsi ədavət olmayıb və B.Sultanlının onun oğluna qarşı heç bir iddiası yoxdur.

O.Gülalıyev həmçinin qeyd edib ki, məktəbin direktoru ilə danışıb və o da Ə.Gülalıyevin məktəbdə kimisə döyməsi barədə məlumatı təkzib edib.

“Əgər insanı vəhşicəsinə döyürlərsə və iki bıçaq zərbəsi vururlarsa, bundan sonra həmin adam əməliyyat olunursa onu necə yüngül xəsarət adlandırmaq  olar? Bıçaq yarasının dərinliyi 12 sm.-dir. Xəstəxanada bizə yaranın ağır olması barədə arayış verdilər. Bu, ciddi cinayətdir. Əgər maşın gəlməsəydi və hücum edənlər qaçmasaydı bütün bunların nə ilə nəticələnəcəyi məlum deyildi”, - O.Gülalıyev bildirib.

“O.Gülalıyev bu hücumda siyasi motivlər görürmü” sualının cavabında o belə deyib: “Mən istintaqın nəticələrini gözləyəcəm. Düşünürəm ki, bu, kifayət qədər rezonans doöuran cinayətdir və polis bunun üstünün açılmasında maraqlı olmalıdır. İstintaq cinayətkarları müəyyən etməli və məsuliyyətə cəlb etməlidir. Əgər bu, baş verməsə, əlbəttə, ortaya çox sual çıxacaq”, - o vurğulayıb.

Qeyd edək ki, O.Gülalıyev 2010-cu ildə Kür zonasında baş vermiş daşqınların və 2012-ci ildə Zaqatala regionunda baş vermiş zəlzələnin nəticələrinin aradan qaldırılması zamanı korrupsiya faktlarını aşkarlamış “Kür” Vətəndaş Cəmiyyəti Qərargahının koordinatorudur. 

Həmçinin O.Gülalıyev “Siyasi məhbuslarsız Azərbaycan” ictimai alyansının üzvü, Demokratik Qüvvələrin Milli Şurasının prezidentliyə namizədi Cəmil Həsənlinin mətbuat mərkəzinin rəhbəridir.—06B-