Hakimiyyət Cəmil Həsənlinin seçicilərlə görüşünə qanunsuz məhdudiyyətlər tətbiq edir

Cəlilabad Rayon İcra Hakimiyyəti sentyabrın 27-nə təyin olunmuş Milli Şuranın prezidentliyə namizədi Cəmil Həsənli ilə seçkiqabağı təşviqat görüşünə razılıq verib. Aksiya saat  16.00-dan 18.00-dək keçiriləcək.

Lakin rayon rəhbərinin birinci müavini Asif  Əzizovun imzaladığı cavab məktubunda qeyd olunur ki, görüşdə “yalnız Cəlilabad rayonunun seçiciləri iştirak edə bilər. Çünki kənar şəxslərin iştirakı namizədlərin tərəfdaşları arasında xoşagəlməz anlar yaşada bilər”.

Cəlilabad rayonuna aidiyyatı olmayan şəxslərin görüşdə iştirakına görə məsuliyyət mitinq təşkilatçılarının üzərinə düşəcək. 

Rayon rəhbərinin müavinin bu fkirlərini Turan-a şərh edən Seçkilərin Monitorinqi və Demokratiyanın Tədrisi Mərkəzinin icraçı katıbi Bəşir Süleymanlı onu məntiqsiz və qanunsuz adlandırıb. 

“Qanunvericilikdə vətəndaşların ərazi mənsubluğu prinsipi üzrə toplantılarda iştirakına məhdudiyyət yoxdur. Belə çıxır ki, Bakı mitinqlərində yalnız bakılılar iştirak etməlidir? Digər tərəfdən, seçkiqabağı təşviqat müddəti 22 günədək endirildiyi bir şəraitdə namizədlər bütün rayonlara getməyi fiziki baxımdan  çatdırmırlar. Odur ki, onlar ayrı-ayrı şəhərlərdə bütün rayonlardan olan seçicilərlə görüşlər keçirə bilər”, - B.Süleymanlı vurğulayıb. 

DQMŞ-nin Mitinq Komitəsindən isə bildirilib ki, Cəlilabad görüşü başqa vaxta keçirilir. Buna səbəb yerli hakimiyyətin hansısa əsassız məhdudiyyət tətbiq etməsidir. —06D-