Parlamentin spikeri Ukraynanın Azərbaycandakı səfirini qəbul edib

Milli Məclisin sədri Sahibə Qafarova dekabrın 24-də Ukraynanın Azərbaycandakı səfiri Yuri Qusevlə görüşüb. Görüşdə Azərbaycan və Ukrayna əlaqələrinə dair fikir mübadiləsi aparılıb.

"Ölkələrimizin etibarlı tərəfdaş olduqları, münasibətlərin möhkəm təməllərə əsaslandığı diqqətə çatdırılıb. Ölkələrimizin ərazi bütövlüyü və suverenliyi məsələlərində bir-birinə qarşılıqlı dəstək göstərdikləri vurğulanıb.

Söhbət zamanı humanitar sahədə əməkdaşlığın da vacibliyi vurğulanıb. Azərbaycan və Ukrayna xalqlarını bir çox ortaq dəyərlərin birləşdirdiyi və bu dəyərlərin xalqlarımızı daha da yaxınlaşdırdığı diqqətə çatdırılıb", deyə Milli Məclisin mətbuat xidmətinin məlumatında bildirilir.

Görüşdə iki ölkənin parlamentləri arasında da mövcud münasibətlərin səviyyəsindən məmnunluq bildirilərək, bu münasibətlərin daha da inkişafına dair müzakirələr aparılıb, deyə Milli Məclisin məlumatında bildirilir.

Öz növbəsində, Ukrayna səfiri X sosial şəbəkəsindəki səhifəsində yazıb ki, görüşdə parlamentlərarası münasibətlərin inkişafı məsələləri müzakirə olunub.

"Azərbaycan Milli Məclisinin spikeri Sahibə Qafarova ilə səmərəli görüş keçirilib. Parlamentlərarası əməkdaşlığın möhkəmləndirilməsi, humanitar yardım məsələlərini, ukraynalı uşaqların reabilitasiyası proqramlarını müzakirə etdik. Azərbaycana köməyi və dəstəyi üçün minnətdaram", deyə səfir qeyd edib.