Partiya günahkarların cəzalandırılmasını tələb edir

Müsavat partiyası Qarabağ veteranı Zaur Həsənovun özünü intihar həddinə çatdırılmasına etiraz bəyanatı yayıb. 

Əlilin Bibiheybət qəsəbəsindəki obyektinin sökülməsinə etiraz olaraq intihara əl atdığı nəzərə çatdırılır. Bələdiyyə ilə müqavilə əsasında Z.Həsənov həmin yeri 2015-ci ilə kimi işlətmək hüququna malik olub. Amma məhkəmə vasitəsilə yer əlindən alınıb, məhkəmə qərarı isə hər hansı araşdırma aparılmadan qəbul edilib.   

“Bunu faktiki olaraq cəmiyyətdəki real vəziyyətin, istər Qarabağ qazilərinin, istərsə də cəmiyyətin aztəminatlı hissəsinin acınacaqlı həyatından doğmuş bir hadisə kimi dəyərləndiririk”, - deyə müəlliflər olaya münasibət ifadə edirlər. 

Ölkədə korrupsiya, məmur özbaşınalığı, insanların öz hüquqlarını məhkəmə vasitəsilə belə təmin edə bilməməsinin acınacaqlı hadisəyə gətirib çıxardığı nəzərə çatdırılır.  

Məmur özbaşınalığına, qanunların icra olunmamasına, haqlarının təmin edilməməsinə etiraz olaraq ölkədə hər gün 10-larla insanın özünə qəsd etməyi düşündüyü iddia edilir. Ölkədə demokratik şərait olmayınca, sosial ədalət təmin edilməyincə belə hadisələrin tez-tez baş verməsi ehtimallarıının qalacağı xəbərdalığı edilir. 

Son olaraq müəlliflər bu məsələdə birbaşa günahkar olan adamların dərhal məsuliyyətə cəlb olunaraq cəzalandırılmasını tələb edirlər. -05D-