Partiya liderləri həbsləri absurd və əsassız saydılar

Müsavat və Xalq Cəbhəsi Partiyalarının rəhbərləri yanvarın 23-də İsmayıllıda baş verən hadisələrin təşkilatçıları kimi Tofiq Yaqublu və REAL hərəkatının rəhbəri İlqar Məmmədovun həbsinə münasibət ifadə ediblər.

“İsmayillı hadisələrinə görə Tofiq Yaqublu və İlqar Məmmədova qarşı ittihamlar tamamilə yalan üzərində qurulub, əsassızdır”. Müsavat Partiyası başqanı İsa Qəmbər bu sözləri Turan-a partiya baqşanının müavini T.Yaqbulu və REAL hərəkatının rəhbəri İ.Məmmədov barəsində bazar ertəsi seçilən həbs-qətimkan tədbirini şərh edərkən bildirib. O, İsmayıllıda hadisələrin yanvarın 23-də başladığını, T.Yaqublunun isə rayona yanvarın 24-də getdiyini, qısa müddət sonra polis tərəfindən saxlandığını və rayondan çıxarıldığını nəzərə çatdırıb. İ.Qəmbərə görə, iqtidarın bu addımları bir tərəfdən genişlənməkdə olan xalq hərəkatının, müxalifətin xalqla bütünləşməsinin qarşısını almaq, digər tərəfdən müxalifəti xalqla təmasdan çəkindirmək üçündür. Müsavat lideri bu həbslərin müxalifəti mübarizədən çəkindirməyəcəyini, bu həbs qərarları ləğv olunmasa, bu şəxslərin hüquqları uğrunda mübarizənin güclənəcəyini söyləyib.

“Bu həbs qərarları əsassız və absurddur”, - deyə AXCP sədri Əli Kərimli həbslərə münasibət ifadə edib. Ə.Kərimli yeni mərhələdə iqtidarın xalqı dinləmək, yoxsa repessiyaları dava etdirmək seçimi edəcəyini cəmiyyətin izlədiyini bildirib. “İsmayıllıdakı kütləvi həbslər, işgəncələr, iki siyasətçinin həbsi iqtidarın qarşıdurma yolu tutmasının göstəricisidir”, - deyə Ə.Kərmli bu həbslərə qiymət verib. AXCP sədri bu həbslərin iqtidarın öz əleyhinə işləyəcəyi mövqeyi ifadə edib. O, cəmiyyət daxilində mövcud iqtidarın antixalq olması haqda qəti inam yarandığını deyib və cəmiyyətin köklü islahat və dəyişikliklərə nail olacağını deyib. -05B-