Paşinyan Azərbaycanın Qoris-Qafan yolunu bağlamasının səbəbini izah edib

Bakı/15.09.21/Turan: Ermənistanın baş naziri Nikol Paşinyan İranın yük maşınlarının Qoris-Qafan yolunun Azərbaycan polisinin nəzarəti altında olan hissəsində yoxlanılmasının mümkün səbəbini açıqlayıb.

2020-ci ilin dekabrında Ermənistan Silahlı Qüvvələri Sovet Ermənistanının sərhədlərinə çəkilib. “Bu proses yeni hərbi gərginlikdən yayınmaq üçün həyata keçirilib”, deyə Paşinyan çərşənbə günü parlamentdə çıxışında bildirib.

Ermənistanın inzibati bölgüsü haqqında 2010-cu il tarixli qanunda qeyd edilib ki, Şurnux və Vorotan kəndlərinin inzibati sərhədləri Ermənistan-Azərbaycan sovet sərhədinə uyğundur.

“Bu hissədə iki yerdə Qoris-Qafan yolu Ermənistan Respublikasının və ya keçmiş Sovet Ermənistanının hüdudlarından kənara çıxır. Məhz buna görə orada məlum yazılar və nəzarət-buraxılış məntəqələri peyda olub”, deyə Paşinyan qeyd edib.

Dekabrda nəqliyyat vasitələri və yük tranziti üçün bu yoldan maneəsiz istifadəyə dair razılıq əldə olunub. Razılıq mətnində xarici yüklərin keçməsindən söhbət getmir, buna görə də Azərbaycan bundan istifadə edir. “Çox güman ki, bizim 9 noyabr və 11 yanvar tarixli bəyanatlarda Ermənistandan dəhliz verilməsindən bəhs edilmədiyi haqqında bəyanatlarımıza cavab olaraq”, deyə Paşinyan bildirib.

Onun sözlərinə görə, Ermənistan MDB müqavilə-hüquq bazasında qeyd edildiyi kimi, xarici yüklərin ölkə sərhədini keçərkən gömrük, pasport məntəqələrindən və digər məntəqələrdən keçməli olması faktını qəbul edir.

Paşinyanın çıxışından belə bir nəticə çıxarmaq olar ki, o, Azərbaycan hakimiyyətinin addımlarını əsaslı hesab edir. -02D-