Paşinyan Ərdoğandan Əliyevə təsir etməyi xahiş edib

Türkiyə regionda əsas oyunçudur və Ermənistan və Azərbaycan arasında sülh müqaviləsinin imzalanması da daxil olmaqla, sülhün bərqərar edilməsində iştirak etməlidir. Bu barədə jurnalistlərə Ermənistan Parlamentinin müdafiə və təhlükəsizlik komissiyasının sədri Andranik Koçaryan bildirib.

Bu fikir Ermənistan baş naziri Nikol Paşinyanın Bakı ilə danışıqlarda köməklik göstərməsi üçün Türkiyə prezidenti Rəcəp Tayyip Ərdoğana müraciət etməsindən sonra səslənib.

"Türkiyə regional proseslərin əsas iştirakçısı və Azərbaycanın ən yaxın müttəfiqidir, 44 günlük müharibə zamanı biz bunu çox yaxşı hiss etdik. Hamı onun rolunu bilir, lakin sülhə nail olmaq üçün bütün mövcud resurslardan istifadə edilməlidir və onlardan biri də Türkiyənin iştirakıdır", deyə Koçaryan qeyd edib. 

O, həmçinin xatırladıb ki, bir müddət əvvəl bütün ermənilərin Katolikosundan İstanbuldakı erməni Patriarxı vasitəsilə erməni əsirlərin qaytarılmasında köməklik göstərməsi xahişi ilə Ərdoğana müraciət etməyi xahiş edib.  

Xatırladaq ki, sentyabrın 24-də Nyu-Yorkda "Türkiyə Evində" Paşinyan və Ərdoğanın görüşü keçirilib. Tezliklə sosial şəbəkələrdə Paşinyanın üzündə təbəssümlə Ərdoğandan həddiyyə olaraq onun "Daha ədalətli bir dünya mümkündür" kitabını qəbul etdiyi fotoşəkil yayılıb. Bu jest Ermənistanda Paşinyan tərəfindən zəiflik və satqınlıq əlaməti kimi tənqidə məruz qalıb.