Pedro Aqramunt AŞPA prezidenti seçilib

İspaniyalı deputat Pedro Aqramunt Avropa Şurası Parlament Assambleyasının bu gün açılan sessiyasında bu qurumun rəhbəri seçilib.

Onun namizədliyi AŞPA-nın “Avropa Xalq Partiyası” siyasi qrupu (fraksiyası) tərəfindən irəli sürülmüşdü.

Yazılmamış qaydalara əsasən, assambleyanın bütün fraksiyalarının nümayəndələri növbəli şəkildə AŞPA rəhbərləri olur.

Aqramunt 2000-ci ildən AŞPA üzvüdür. 2010-2015-ci illərdə o, AŞPA-nın Azərbaycan üzrə həmməruzəçisi olub.

2013-cü ilin yanvarında Aqramunt Kristof Ştrasserin hazırladığı Azərbaycanda siyasi məhbuslar üzrə məruzə-hesabatın əleyhinə çıxmışdı. Bundan sonra Azərbaycanda ictimai fəalların və jurnalistlərin həbs dalğası güclənib.

İspaniya mətbuatının məlumatına görə, Aqramunt gənc ikən Franko rejimi ilə əməkdaşlıq edib.

Aqramunt 2017-ci ilin yanvarında mandatı yenilənməklə, iki il müddətinə seçilib. -06D-