Polis müxalifətçini psixoloji cəhətdən sındırmağa çalışır

15 gün müddətinə həbs edilmiş Müsavat Partiyası liderinin müşaviri Mustafa Hacıbəyli Abşeron rayon Polis İdarəsinin istintaq təcridxanasında məcburi əməyə cəlb edilib.

Onun vəkili Nemət Kərimlinin Turan-a verdiyi məlumata görə, iyunun 3-də müvəkkili ona bildirib ki, ona istintaq təcridxanasının rəis müavini tərəfindən psixoloji təzyiq göstərilir. Ona fiziki iş tapşırılır. Axşam onun üçün təcili yardım çağırılıb.

Bu gün vəkil Abşeron rayon polis rəisi ilə görüşüb. O bildirib ki, Hacıbəyli fiziki iş yerinə yetirməlidir. Lakin vəkil bunun hüquqazidd olduğunu bildirib və heç kim işə məcbur edilə bilməz.

“Polis rəisi əlində əmr olduğunu bildirib. Ondan əmri və normativ aktları göstərməyi tələb etdim. Lakin polis rəisi bunu etmədi, bununla belə, öz müavinlərinə Mustafa Hacıbəylini məcburi əməyə cəlb etmək tapşırığı verdiyini etiraf edib”, deyə vəkil bildirib.

Onun sözlərinə görə, Hacıbəylinin əməyə məcbur edilməsi haqqında məlumat BQXK-yə veriləcək. Vəkil hesab edir ki, bu tədbirlər mayın 28-də Novxanıda müxalifətin mitinqindən sonra xuliqanlıq ittihamı ilə 15 gün müddətinə həbs edilmiş Hacıbəylini psixoloji cəhətdən sarsıtmaq məqsədi daşıyır. -16D04-