Praqada prezident İlham Əliyev Serj Sarkisyanla mübahisə edib

Prezident Administrasiyası rəhbərinin müavini Novruz Məmmədovun cümə günü özünün Tvitterdəki mikrobloqunda yerləşdirdiyi məlumata görə, Praqada “Şərq Tərəfdaşlığı” sammitində prezident İlham Əliyev Serj Sarkisyanın çıxışına cavab verib.

Məlumata görə, S.Sarkisyan öz çıxışında əsassız olaraq Türkiyəni ittiham edərkən İ.Əliyev bu ölkəni müdafiə edib.

“Türkiyə burada deyil, amma biz buradayıq. Mən Türkiyənin yerinə cavab verərəm”, - N.Məmmədov İ.Əliyevdən sitat gətirib.

Yazıdan belə məlur olur ki, İ.Əliyev S.Sarkisyanın erməni soyqırımı ilə bağlı fikirlərini tənqid edib.

Lakin prezident İ.Əliyevin öz saytı da daxil olmaqla, digər mənbələr bu barədə bir şey yazmır, odur ki, İ.Əliyevin Sarkisyana necə cavab verdiyi bəlli deyil.

Xatırladaq ki, aprelin 24-25-də Praqada Aİ “Şərq Tərəfdaşlığı” proqramının sammiti keçirilir. Tədbirdə Azərbaycan, Gürcüstan, Ukrayna, Moldova və Ermənistan rəhbərləri iştirak edirlər. -02В-