Prezident İlham Əliyev Ağdamın azad olunması münasibətilə xalqı təbrik edib

Bakı/20.11.20/Turan: Prezident İlham Əliyev Ağdam rayonunun işğaldan azad olunması münasibətilə Azərbaycan xalqını təbrik edib.

“Bütün ağdamlıları ürəkdən təbrik edirəm. Əziz ağdamlılar, siz artıq köçkün deyilsiniz. Siz doğma dədə-baba torpağınıza qayıdacaqsınız”, - prezident qeyd edib.

Onun sözlərinə görə, indi Ağdam üçün yeni dövr başlayır, bizim böyük planlarımız var.

O qeyd edib ki, azad edilmiş digər rayonlar kimi Ağdam da erməni işğalında ikən tamamilə dağıdılıb.   

Ancaq dağılmış bütün şəhərlər, rayonlar tamamilə bərpa olunacaq, əhali öz yerlərinə-yurdlarına qaytarılacaq.

"Ağdam rayonu bizim gələcək planlarımıza daxil ediləcək, çünki həm ərazisi, həm də əhalinin sayına görə bu, ən böyük rayondur", - İ.Əliyev bildirib.

O deyib ki, bərpa işlərinə artıq başlanılıb, ilkin olaraq Füzuli-Şuşa avtomobil yolunun tikintisinə 50 mln. manat ayrılıb.

Gələcək trass bir neçə sahəyə bölünüb və layihəni qısa müddətdə başa çatdırmaq üçün yolu eyni vaxtda bir neçə şirkət tikəcək.

Onun sözlərinə görə, gələcəkdə, müəyyən müddətdən sonra Ağdam-Xankəndi yolu da açılacaq.

"Hesab edirəm ki, kommunikasiyaların açılması, o cümlədən  Naxçıvan Muxtar Respublikası ilə Azərbaycanın əsas hissəsi arasında, gələcəkdə  regionda uzunmüddətli sülhə töhfə verəcək", - İ.Əliyev bildirib.—06D-