Prezident İlham Əliyev: “Azərbaycan Avropaya qaz nəqlini artırmağa hazırdır”

Bakı/01.06.22/Turan: Avropada Azərbaycan qazına tələbat artır və Bakı karbohidrogenlərin nəqlini artırmaq üçün “Cənub” qaz dəhlizinin genişləndirilməsinə hazırdır. Bu barədə Azərbaycan prezidenti İlham Əliyev çərşənbə günü Bakı Enerji Həftəsinin açılışında bildirib.

Əliyev qeyd edib ki, "potensial istehlakçılar başa düşməlidirlər ki, il ərzində hasilatı kəskin şəkildə artırmaq mümkün deyil".

“Müqavilələr lazımdır, danışıqları sürətləndirmək lazımdır,  istehsalı artırmaq və mövcud infrastrukturu genişləndirmək üçün enerji şirkətləri ilə işləmək lazımdır”, - Əliyev davam edib.

“Cənub” qaz dəhlizi inteqrasiya edilmiş qaz nəqliyyat sistemidir və onun son seqmentinin - Transadriatik qaz kəmərinin gücü ildə 10 milyard kubmetr qaz təşkil edir. "Hazırda biz gücün artırılması barədə düşünürük, çünki tələbat var. Ancaq bu, vaxt,  xeyli maliyyə xərci və sıx koordinasiya, cəlb edilmiş bütün ölkələrlə fəal dialoq tələb edir. Biz buna hazırıq. Energetika naziri və SOCAR artıq təlimat alıblar və biz fəal danışıqlar prosesindəyik", - dövlət başçısı bildirib.

*İyunun 1-dən 4-dək Azərbaycanın paytaxtında Bakı Enerji Həftəsi keçirilir. Bu 27-ci Beynəlxalq Xəzər Neft və Qaz, 10-cu Yubiley Xəzər Beynəlxalq Energetika və Bərpaolunan Enerji sərgiləri və Bakı Enerji Forumunu birləşdirir.

Bu il sərgilərdə və forumda 30 ölkədən, o cümlədən Azərbaycan, ABŞ, Almaniya, Belarus, Birləşmiş Ərəb Əmirlikləri, Böyük Britaniya, Çin, Fransa, Gürcüstan, Hindistan, Niderland, İsrail, İspaniya, İsveçrə, İndoneziya, İtaliya , Qazaxıstan, Rusiya, Türkiyə, Səudiyyə Ərəbistanı, Yaponiya və digər ölkələrdən 249 şirkət iştirak edir. –06D-