Prezident İlham Əliyev: “Azərbaycan və Türkiyə paralel fəaliyyət göstərirlər”

Ermənistan Azərbaycanla münasibətləri normallaşdırmaq üçün mifologiyadan əl çəkməli və qonşularına qarşı heç bir iddiasının olmadığını sübut etməlidir. Bu barədə prezident  İlham Əliyev aprelin 23-də Bakıda keçirilən beynəlxalq konfransın iştirakçıları ilə görüşdə bildirib.

"Ermənilərdə ciddi psixoloji pozuntular var ki, bu, cəmiyyətə olduqca mənfi təsir göstərir. Gənclərlə görüşlərdən birində Ermənistanın keçmiş prezidenti Serjik Sarkisyandan soruşublar ki, ermənilər Ararat dağını nə vaxt azad edəcəklər? Cavabında Sarkisyan deyib ki, biz Qarabağı azad etdik, qalanını isə sizin nəsil edəcək. Bax, bu, həmin psixoloji pozuntunun  sübutudur", - Əliyev deyib.

O həmçinin qeyd edib ki, Azərbaycanla sülh bağlamaq üçün üçün təkcə belə xəyali ideyalardan yox, həm də artıq qəbul edilmiş qərarlardan imtina etmək vacibdir. Məsələn, Ermənistan Konstitusiyasında müstəqillik bəyannaməsindən bəhs olunur ki, orada da Dağlıq Qarabağ Ermənistan ərazisi kimi xatırladılır.

"Bu xatırlatma Konstitusiyadan çıxarılmasa, necə sülh bağlaya bilərik? Əgər Ermənistanın gerbində Türkiyə ərazisində olan Ağrıdağ (Ararat) varsa, necə sülh bağlana bilər?

Nə qədər ki bu məsələlər həll olunmayıb, sülh sazişi olmayacaq və bu məsələdə Azərbaycanla Türkiyə birgə fəaliyyət göstərirlər", - İlham Əliyev  qeyd edib.