Prezident İlham Əliyev azərbaycanlı məmurların mənəvi kodeksini ifadə edib?

Prezident İlham Əliyev Azərbaycan məmurlarının mənəvi kodeksini ifadə edib: “Dövlət məmurları xalqa xidmət edir və etməlidirlər. Bu məsələlərlə bağlı mən fikirlərimi bildirmişəm. Dövlət məmuru cəmiyyətdə hər bir vətəndaş üçün nümunə olmalıdır. Təvazökarlıq, saflıq və vətənə xidmət nümunəsi. Dövlət məmurları seçilmiş insanlar olmalıdır. Onların həm peşəkarlığı, həm də mənəvi keyfiyyətləri yüksək səviyyədə olmalıdır. Məmur-vətəndaş münasibətləri hörmət əsasında qurulmalıdır. Harada ki, nöqsanlar, pozuntular var, əlbəttə ki, tədbirlər görülür və bu proses bundan sonra da davam etdiriləcək”, -  dövlət başçısı aprelin 14-də hökumətin  2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında bildirib.

İ.Əliyev rüşvətxorluğa və korrupsiyaya qarşı daha ciddi mübarizəyə çağırıb. 

Dövlət başçısı bundan əvvəl də məmurları təvazökar olmağa çağırıb. Lakin hələ də yüksək vəzifəli şəxslərin heç biri öz gəlirlərini və digər aktivlərini qanunvericiliyin tələb etdiyi kimi ictimaiyyətə açıqlamayıb. Bundan əlavə, ötən il qanunvericiliyə edilən düzəlişlər məmurlara kommersiya hüquqi şəxslərdə öz iştirak payını ictimaiyyətdən gizlətməyə imkan verir. Bununla da qanunvericilik məmurlara sadə deyil, əksinə dəbdəbəli həyat üçün əlverişli şərait yaradır.06D--