Prezident İlham Əliyev Beyləqanda gənclərlə görüşüb

Prezident İlham Əliyev Azərbaycanda ictimai-siyasi sabitliyin pozulmasında maraqlı olan xarici qüvvələrin olduğunu bildirib.

“Bu gün Azərbaycanın uğurlu inkişafını heç də hər kəs qəbul etmir. Ölkə daxilində də milli satqınlar var ki, onlar xarici antiazərbaycan dairələrinə öz vicdanını satıblar. Xarici dairələr var ki, çalışırlar Azərbaycanda sabitlik pozulsun, inkişaf dayansın, Azərbaycan asılı vəziyyətə düşsün”, - dövlət başçısı avqustun 28-də Beyləqan rayonunda gənclərlə görüşündə deyib.

“KİV-də  Azərbaycana qarşı  qarayaxma, böhtan kampaniyaları aparılır”.

“İndi heç kəs üçün sirr deyil ki, müxtəlif fondlar vasitəsilə, müxtəlif ölkələrdə kütləvi iğtişaşların, qarşıdurmanın yaradılması üçün praktiki addımlar atılır. Əgər 10 il bundan əvvəl bu, daha da məxfi formada aparılırdısa, hazırda artıq bütün maskalar yırtılıb, heç gizlətmirlər. Məqsəd də odur ki, təbii resurslarla zəngin, böyük potensiala, əlverişli coğrafi mövqeyə malik ölkələr təsir altına düşsün və başqasının diktəsi ilə hərəkət etsin, oturub-dursun. Bu isə o ölkələri məhvə aparır. Biz yaxın tarixdən bunu bilirik. Bizim qonşuluğumuzda baş vermiş hadisələrin nələrə gətirib çıxardığı da gözümüzün qabağındadır”, - o bildirib. 

“Bilin ki, Azərbaycan üçün də oxşar ssenarilər yazılıb. Sadəcə olaraq bizim iqtidarımızın dəmir iradəsi imkan vermədi ki, bu ssenarilər burada həyata keçirilsin və heç vaxt imkan verməyəcəyik”, - İ.Əliyev vurğulayıb.

Ona görə, siz gənclər bunu yaxşı bilməlisiniz və bizim gənclərimiz xarici dairələrin təsiri altına düşməməlidir. 

“Bizə xaricdən heç bir yardım, kömək lazım deyil. Lazım olanda onsuz da heç kim bizə kömək etməyib. Azərbaycan ağır vəziyyətdə olanda kim gəlib bizə kömək edib? Heç kim. Mənim yadımdadır, vaxt var idi ki, biz beynəlxalq qurumlardan kredit ala bilmirdik, vermirdilər kredit. Amma indi biz özümüz başqa ölkələrə kredit veririk. Yəni, bizim iqtisadi inkişafımız sırf Azərbaycan dövlətinin, hökumətinin uğurudur və aparılan siyasətin nəticəsidir”, - dövlət başçısı bildirib.

Amma yardım adı altında Azərbaycana hər il milyonlarla dollar pul ötürülür. O pul müxalifət qurumlarının cibinə gedir. Düzdür, bizim müxalifət pula o qədər meyllidir ki, o, ayrılan qrantların 70-80 faizini öz cibinə qoyur. Ona görə o pullar onu göndərənlərin iradəsi ilə xərclənmir. Ancaq fakt budur. Biz bunu bilirik, burada heç nəyi gizlətmək mümkün deyil. Bütün bank hesablarına nə qədər gəlir, kimə gəlir. Bilin ki, verilən o vəsait ölkəmizin maraqlarının əleyhinə işləyən vəsaitdir”, - İ.Əliyev vurğulayıb.

Onu da qeyd edək ki, bu yaxınlarda İ.Əliyev deyib ki,  Azərbaycanın indiki uğurları Qərb tərəfdaşlarının dəstəyi sayəsində mümkün olub.

Belə ki, iyunun 3-də ənənəvi Caspian Oil and Gas sərgisinin açılışında deyib ki, 21 il öncə bu tədbirin keçirilməsi dünyanın diqqətini müstəqil Azərbaycana yönəldən ilk mühüm addım olub.

“Son illər Azərbaycanın əldə etdiyi uğurlar tərəfdaşlarla birgə qazanılıb”, - o vurğulayıb.

İlk sərgidən bir neçə ay sonra “Əsrin müqaviləsi” imzalanıb ki, bu da Azərbaycanın bugünkü uğurlu inkişafını əhəmiyytəli dərəcədə müəyyən edib.

“Bu gün o zaman bizə inanaraq bizimlə işləmək arzusunda olduğunu bəyan edən bütün şirkətlərə, investorlara təşəkkürümü bildirmək istəyirəm. Onlar bizə,  Azərbaycanın sabitliyinə, uğurlu gələcəyinə inandılar, bizim yanımızda oldular, bizimlə  bugünkü reallıqları təmin etdilər”, - dovlət başçısı vurğulayıb.06D-