Prezident İlham Əliyev ilin birinci yarısının yekunlarından danışarkən diqqəti prioritet xarici siyasətə çəkib

Bakı/15.07.22/Turan:Qonşu ölkələrlə əlaqələr hər zaman Azərbaycan üçün əsas prioritetlərdən biri olub və bu il bu istiqamətdə addımlar atılıb. 

Bunu iyulun 15-də prezident İlham Əliyev bu ilin altı ayının yekunlarına həsr olunan müşavirədəki çıxışında deyib. 

Prezident qeyd edib ki, onun Rusiya, İran, Gürcüstan prezidentlərilə görüşləri bir daha bunu göstərir.

Dövlət başçısının sözlərinə görə, Amerika-Azərbaycan əlaqələrinin inkişafı istiqamətində önəmli addımlar atılıb, yüksək vəzifəli şəxslərin qarşılıqlı səfərləri təşkil edilib.

"Amerika Birləşmiş Ştatlarının prezidenti mənə iki dəfə məktub göndərib - həm Müstəqillik Günü, həm də Bakı Enerji Həftəsinin açılışı ilə bağlı. Mənim də cavab məktublarımda və mənə göndərilən məktublarda da əlaqələrimizin önəmi xüsusilə qeyd olunub. Bu əlaqələrin həm böyük tarixi, həm də gözəl gələcəyi var. Yəni, bir sözlə, əsas güc mərkəzlərilə, eyni zamanda, əsas beynəlxalq təşkilatlarla, baxın, cəmi bu altı ay ərzində nə qədər böyük işlər görülüb”. 

Prezidenti qeyd edib ki, Azərbaycan hər istiqamət üzrə irəliləyir: “Bizim mövqeyimiz hər zaman müstəqil mövqe olub, biz hər zaman öz mövqeyimizi açıq nümayiş etdirmişik, o cümlədən buna görə dünyada böyük hörmət qazanmışıq. Həmişə sözümüzdə dururuq, həmişə verilən sözə sadiqik”.

Əliyev qeyd edib ki, bu il ölkənin xarici siyasəti çox fəal olub:. "Xarici siyasət istiqamətində hesab edirəm ki, yeni önəmli addımlar atılıb və ölkəmizin beynəlxalq nüfuzu daha da artıb".

O, nəticələr arasında Azərbaycanın Qoşulmama Hərəkatındakı uğurlu sədrliyini xüsusi vurğulayıb: "Bizim sədrliyimiz bildiyiniz kimi, 2023-cü ilə qədər yekdil fikirlə bir il uzadılıb. Bu, onu göstərir ki, ölkəmiz 120 ölkə arasında çox böyük nüfuz qazanmışdır və bizə olan inam bu illər ərzində daha da artıb. Biz də məsuliyyətli ölkə  və Qoşulmama Hərəkatının fəal sədri olaraq bu təsisatın institusional inkişafına da böyük töhfə vermişik. Önəmli addımlardan biri bu il Bakıda keçirilmiş Qoşulmama Hərəkatının Parlament Şəbəkəsinin toplantısı idi və Parlament Şəbəkəsinin yaradılması idi. Bakıda keçirilmiş bu önəmli tədbir bir daha göstərdi ki, bu Hərəkatın çox böyük potensialı var, həmrəyliyi dərinləşdirmək, əməkdaşlığı genişləndirmək və qarşılıqlı beynəlxalq dəstək üçün bu, çox önəmli platformadır. Bu, bizim təşəbbüsümüz idi və bu təşəbbüs artıq özünü real həyatda göstərir”.-0-