Dövlət Təhlükəsizliyi Xidməti Dövlət Gömrük Komitəsində həbslər barədə

Bakı/15.07.22/Turan:  İyulun 15-də Dövlət Təhlükəsizliyi Xidməti Dövlət Gömrük Komitəsində xüsusi əməliyyat və yüksək vəzifəli şəxslərin həbsi barədə məlumat verib.

İyunun 10-da Dövlət Təhlükəsizliyi Xidməti Dövlət Gömrük Komitəsinin vəzifəli şəxslərinin qanunsuz hərəkətləri faktı üzrə kompleks cinayət işinə başlayıb.

Müəyyən edilib ki, Dövlət Gömrük Komitəsinin nəzdində "Azərterminalkompleks" Birliyinin direktoru Ehtiram Xəlilov öz səlahiyyətlərindən istifadə edərək rüşvət üçün gömrük nəzarətindən keçən malların və nəqliyyat vasitələrinin dəyərini aşağı salıb.

Bundan əlavə, Enerji Resursları və Dəniz Nəqliyyatı üzrə Baş Gömrük İdarəsinin rəis müavini Rəşad Babayev və yol vergisi şöbəsinin rəis müavini Şükür Səfərov cinayət məsuliyyətinə cəlb olunublar.

Onlar rüşvət müqabilində iri qabaritli xarici yük avtomobillərini gömrük rüsumlarından azad ediblər. Hər ikisi məhkəmənin qərarı ilə həbs edilib.

Dövlət Gömrük Komitəsinin  Əməliyyat-İstintaq İdarəsinin rəisi Məsum Rəsulov büdcə vəsaitlərinin oğurlanmasında şübhəli bilinərək saxlanılıb.  O, Cinayət Məcəlləsinin 179.4-cü (küllü miqdarda dövlət vəsaitinin mənimsənilməsi) və 308.1-ci (vəzifə səlahiyyətlərindən sui-istifadə) maddələrilə ittiham olunur.

Məsum Rəsulov əsasən dövlət xidmətlərinin maliyyələşdirilməsinə ayrılan vəsaitlərin oğurlanmasında ittiham olunur. 016B