Prezident İlham Əliyev əmindir ki, Azərbaycan və Ermənistan arasında sülhün bərqərar olmasının beş prinsipi həyata keçiriləcək

Bakı/15.07.22/Turan: Azərbaycan prezidenti İlham Əliyev 44 günlük Vətən Müharibəsi başa çatdıqdan sonra Azərbaycan-Ermənistan münasibətlərinin normallaşdırılmasında irəliləyişin olmamasından təəssüflənib.

İyulun 15-də bu ilin altı ayının yekunlarına həsr olunmuş iclasda çıxış edən Əliyev bəzi müsbət məqamları, o cümlədən delimitasiya üzrə işçi qruplarının ilk iclasını da dilə gətirib.

"Hesab edirəm ki, ikinci görüş artıq praktiki məsələlərin müzakirəsinə həsr olunacaq. Təbii ki, bu formatda olan işdən biz hələ ki tez nəticə gözləmirik, müəyyən dəqiqləşdirmələr bir prosesdir.

Əliyev əmin olduğunu bildirib ki, Azərbaycan və Ermənistan arasında sülhün bərqərar olmasının Azərbaycanın təqdim etdiyi beş əsas prinsipi Ermənistan rəhbərliyi rəsmən qəbul edəcək.

"Biz bu məsələni bir neçə qonşu dövlətlə müzakirə etmişik - Türkiyə ilə, Rusiya ilə, İranla müzakirə etmişik və bu mövqeyə dəstək verirlər. Avropa İttifaqı, Amerika Birləşmiş Ştatları - biz bu birliklərlə bu məsələni müzakirə etmişik və faktiki olaraq indi sülhün qurulması üçün əsas yaradılıb. Yenə də Azərbaycan layihə göstərib, yenə də bu beş prinsipi formalaşdıran bizik və əgər biz bu təşəbbüsü öz üzərimizə götürməsəydik, bu günə qədər bu işdə də heç bir inkişaf olmazdı”, - o qeyd edib. -0-