Prezident İlham Əliyev Avropa İttifaqı ilə enerji təhlükəsizliyi haqda sazişi anons edib

Bakı/15.07.22/Turan: Azərbaycan prezidenti İlham Əliyev ümidvar olduğunu bildirib ki, Avropa İttifaqı ilə yeni sazişə dair bütün məsələlər yaxın vaxtlarda razılaşdırılacaq: “Bu il Avropa İttifaqı ilə fəal əməkdaşlıq aparılıb. Bildiyiniz kimi, biz yeni saziş üzərində işləyirik. Sazişin böyük hissəsi razılaşdırılıb və razılaşdırılmamış məsələlər də müzakirə olunur. Ümid edirəm ki, yaxın gələcəkdə bütün məsələlər razılaşdırılacaq".

Əliyev həmçinin qeyd edib ki, Avropa İttifaqı Şurasının prezidenti ilə intensiv əlaqələr, ilk növbədə, Azərbaycan-Ermənistan münasibətlərinin normallaşdırılması üzərində qurulub: “Ancaq eyni zamanda  Avropa İttifaqı-Azərbaycan əlaqələrinin gələcək inkişafı ilə bağlı geniş müzakirələr aparılır. Yaxın günlərdə Avropa İttifaqı ilə Azərbaycan arasında önəmli sənəd - enerji təhlükəsizliyilə bağlı sənəd imzalanacaq və bizim əməkdaşlığımızı daha yüksək səviyyəyə qaldıracaq”.-0-