Prezident İlham Əliyev Müdafiə Sənayesi Nazirliyinin zavodunda olub

Bazar ertəsi prezident İlham Əliyev Müdafiə Sənayesi Nazirliyinin təcrübə-sınaq zavodunun əsaslı yenidənqurmadan sonra açılışında iştirak edib.

Müdafiə sənayesi naziri Yavər Camalov bildirib ki, 2012-ci ildə Azərbaycan Texniki Universitetində xüsusi texnika və texnologiya fakültəsi yaradılıb. 74 tələbənin təhsil aldığı fakültədə silah və silah sistemləri, optotexnika, priotexnika vasitələrinin istehsal, kompozisiya materiallarının, müdafiə təyinatlı məmulatların hazırlanması texnologiyaları, çoxkanallı trapasfer rabitə cihazlarının istismar və təmiri ixtisasları tədris olunur. 

Müəssisə ilə tanışlıq zamanı qeyd olunub ki, zavod 1990-cı ildə Bakı Aviasiya İstehsalat Birliyinin “Klimat” Konstruktor Bürosu kimi fəaliyyətə başlayıb. Sovet İttifaqının süqutundan sonra müəssisənin fəaliyyəti məhdudlaşıb.

Zavodun yenidən qurulmasında əsas məqsəd atıcı silahların, o cümlədən avtomatların, pulemyotların, snayper tüfənglərinin yaradılması, modernləşdirilməsi və kütləvi istehsalı üçün şəraitin yaradılmasıdır. 

Hazırda burada “İstiqlal-2”, “İstiqlal-4”, “İstiqlal-1T”, “Şimşək-9” və digər müdafiə təyinatlı silahlar sınaqdan keçirilir.

Konstruktor Bürosu da müasir avadanlıqla təmin olunub.

İ.Əliyev müəssisədə layihələndirilən və hazırlanan müşahidə cihazları, zirehli texnika və atıcı silahlara baxıb. Məlumat verilib ki, zavodda hazırlanan xüsusi təyinatlı “Gürzə” patrul maşını 2,5 ton yükgötürmə qabiliyyətinə malikdir. Ən son yeniliklərlə təchiz olunan bu maşın “Toyota HİLOYX 12” modelinin bazasında yaradılıb və yalnız Azərbaycanda yığılır. 

Y.Camalov bildirib ki, 2012-ci ildə 437 adda müdafiə təyinatlı məmulatın istehsalı üzrə müqavilə bağlanıb. Hazırda müdafiə təyinatlı məmulatların çeşidinin sayı 700-ə çatdırılıb.-02D-