Prezident İlham Əliyev Pakistanda hərbi məhsulların idxalı məsələsini müzakirə edib

Azərbaycan prezidenti İlham Əliyevin Pakistana səfəri başa çatıb. O, İqtisadi Əməkdaşlıq Təşkilatının (ECO) XIII sammitində iştirak edib.

Rəsmi məlumata görə, sammitdə çıxış edən İ.Əliyev ECO-nu Bakı üçün mühüm beynəlxalq təşkilat adlandırıb.

Azərbaycan 2012-ci ildən təşkilatın sədri kimi bu qurumu möhkəmləndirmək, onun dünya iqtisadi əməkdaşlığında iştirakını fəallaşdırmaq və üzv ölkələr arasında tərəfdaşlığı təbliğ etmək üçün bütün səylərini göstərib.

Azərbaycan müsəlman ölkələri arasında həmrəyliyə mühüm önəm verir.

İ.Əliyev qeyd edib ki, 2017-ci il ölkədə “İslam Həmrəyliyi İli” elan edilib.

İ.Əliyev Pakistan prezidenti Məmnun Hüseyn, baş nazir Məhəmməd Nəvaz Şərif, Türkiyə prezidenti Rəcəp Tayyib Ərdoğanla ikitərəfli danışıqlar aparıb.

Şəriflə görüş zamanı müdafiə və müdafiə sənayesi sahəsində konkret layihələr müzakirə edilib və Azərbaycanın Pakistanın hərbi- sənaye kompleksinin məhsullarını idxal etməsilə bağlı razılaşma əldə edilib.

Bundan əlavə, iki ölkə arasında ticarət dövriyyəsinin artırılmasının vacibliyi qeyd olunub. Bu məqsədlə Azərbaycanın 20 şirkəti Pakistana səfər edib.

Söhbət zamanı energetika sahəsində əməkdaşlıq məsələləri müzakirə olunub və bu sahədə ikitərəfli saziş imzalanıb.—06D--