Prezident İlham Əliyev Rusiya Xarici İşlər Nazirliyinin xüsusi nümayəndəsi İqor Xovayevi qəbul edib /YENİLƏNİB/

Görüşdə Ermənistan ilə Azərbaycan arasında münasibətlərin normallaşdırılması, sülh müqaviləsinin hazırlanması üzrə danışıqlar prosesi barədə fikir mübadiləsi aparıldı.

İqor Xovayev regiona səfəri və Rusiyanın Ermənistan ilə Azərbaycan arasında sülh müqaviləsinin hazırlanması üzrə danışıqlar prosesinə dəstək vermək üçün atdığı addımlar barədə məlumat verdi.

*   *   *

2023 Fevral 14 (Çərşənbə axşamı) 13:24:51

Prezident İlham Əliyev Rusiya Xarici İşlər Nazirliyinin xüsusi nümayəndəsi İqor Xovayevi qəbul edib

Bakı/14.02.23/Turan:Fevralın 14-də dövlət başçısı İlham Əliyev Rusiya Xarici İşlər Nazirliyinin Azərbaycan və Ermənistan arasında münasibətlərin normallaşdırılması üzrə xüsusi nümayəndəsi İqor Xovayevi qəbul edib. Bu barədə ölkə prezidentinin mətbuat xidməti məlumat yayıb. Görüşün təfərrüatları hələ açıqlanmayıb.

Xatırladaq ki, bu günlərdə Xovayev Yerevana səfər edib, Ermənistan rəhbərliyilə Moskvanın nizamlanmada iştirakını müzakirə edib.

Ertəsi gün Ermənistanın xarici işlər naziri Ararat Mirzoyan Rusiyanın xarici işlər naziri Sergey Lavrova zəng edib. Söhbət zamanı Lavrov Ermənistan, Azərbaycan və Rusiya liderlərinin üçtərəfli sazişinin yerinə yetirilməsinin vacibliyini bildirib.

Öz növbəsində, Rusiya Xarici İşlər Nazirliyinin nümayəndəsi Mariya Zaxarova Yerevanı Rusiyanın maraqlarına zidd olaraq Qərbi Ermənistan-Azərbaycan münaqişəsinin həllinə cəlb etmək cəhdində ittiham edib. 02D