Prezident İlham Əliyevin məmurlara xəbərdarlığı

Prezident İlham Əliyev avqustun 14-də İsmayıllıda içməli su təchizatı sisteminin işə salınması mərasimində məmurları özlərini tutduqları vəzifələrə layiq aparmağa çağırıb.  Onu sözlərinə görə, bəzi hallarda məmurlar özlərini apara bilmirlər. 

“Bəzi hallarda məmurlar özlərini apara bilmirlər. Onların özləri, onların yaxınları insanları incidirlər, qıcıqlandırırlar, yersiz hərəkətlər edirlər və özlərini təvazökar aparmırlar. Belə olan halda əlbəttə ki, ciddi tədbirlər görülür və görüləcəkdir”, - dövlət başçısı xəbərdarlıq edib. Onun fikrincə, vəzifəli şəxslər Vətənə, xalqa sədaqətlə xidmət etməlidir. 

“Hər bir vəzifə sahibi bilməlidir ki, o, xalqa xidmət etmək üçün bu vəzifəni tutub, o cümlədən də mən. Bu vəzifəni mən ancaq xalqa xidmət etmək üçün icra edirəm. Hər bir vəzifəli şəxs öz məsuliyyətini dərk etməlidir, Vətən üçün, xalq üçün çalışmalıdır. Bax, əgər hər bir yerdə, hər bir səviyyədə bu prinsiplər tam üstünlük təşkil etsə, onda ölkəmiz daha da sürətlə qabağa gedəcəkdir”, - dövlət başçısı bildirib. 

Qeyd edək ki, bu ilin yanvarında İsmayıllıda “Çıraq” otelinin meneceri yol qəzası törədərək yerli sakinləri təhqir etdikdən sonra xalq etirazları baş qaldırmışdı. Qeyri-rəsmi məlumatlara görə, insidentdə  əmək və sosial müdafiə naziri Füzuli Ələkbərovun oğlu iştirak edib. Sosial şəbəkələrdə “Çıraq” otelinin ona məxsus olmasını təsdiqləyən sənədlər yayılıb. Qəzəblənmiş camaat oteli yandırıb.

Bu hadisələrdən bir ay sonra İ.Əliyev müşavirə zamanı məmurlara və onların övladlarına xəbərdarlıq edərək vətəndaşları qıcıqlandıran hərəkətlərə yol verməməyə çağırıb. 

Həımin müşavirədən sonra İ.Əliyev İsmayıllı rayon administrasiyasının rəhbərini, əmək nazirinin qardaşı Nizami Ələkbərovu işdən azad edib. -16D06-