Prezidentliyə namizəd Cəmil Həsənlinin Gəncə görüşünə maneələr yaradılır

Gəncə Dövlət Dram Teatrının zalında Milli Şuranın prezidentliyə namizədi Cəmil Həsənlinin seçicilərlə görüşü başlayıb. 

Görüş yerindən Turan-a verilən xəbərə görə, zala 500-ə qədər adam toplaşıb və adamlar gəlməkdə davam edirlər.

Digər görüş yerlərində olduğu kimi burada da yerli hakimiyyət maneələr yaradıb. Belə ki, əsas giriş qapısından insanları buraxmamaq üçün “təmir işləri” başlanıb, qapının önünə sement, taxta və digər materiallar tökülüb. İnsanları dar qapıdan keçməyə məcbur ediblər. Amma buna etiraz edən görüş  iştirakçıları əsas qapını açaraq zala giriblər. 

Bundan əlavə, yerli hakimiyyət C.Həsənlinin Gəncəyə gəlişini əngəlləmək üçün şəhid ailələri və müharibə veteranları adından İnternet saytlara etiraz bəyanatı ötürüb. 

Polis şəhərin girşində, eləcə də başqa istiqamətlərdən gələn şəxsləri saxlayaraq görüş keçirilən məkana buraxmır. Amma bütün bu maneələrə baxmayaraq, görüş davam edir.-05C-