Prokuror həmkarlar ittifaqı fəalı üçün 10 il həbs istəyir

Çərşənbə axşamı Bakı Ağır Cinayətlər Məhkəməsində həmkarlar ittifaqı fəalı Afiyəddin Məmmədovun işi üzrə proses davam edib.

İclasda onun vəkili Zibeydə Sadıqova bir sıra vəsatətlərlə çıxış edib. O, məhkəmədən hadisə yerində videomüşahidə kameralarının görüntülərini, həmçinin zərərçəkmişin keçirdiyi cərrahi əməliyyatların siyahısını istəməyi xahiş edib.

Müdafiə tərəfi həmçinin zərərçəkmişin guya Məmmədov ona xəsarət yetirdikdən sonra keçirdiyi cərrahi əməliyyatın videokadrlarını istəməyi xahiş edib.

Vəkil qeyd edib ki, hazırda bütün əməliyyatların videosu çəkilir. Lakin vəsatətlər təmin edilməyib.

Bundan sonra dövlət ittihamçısı məhkəmədən Məmmədovun 10 il müddətinə azadlıqdan məhrum edilməsini istəyib. Məmmədov özü bildirib ki, nə məhkəməni, nə də onun qərarlarını tanımır.

Məhkəmənin növbəti iclası yanvarın 14-nə təyin edilib.

*  "İşçi masası" alternativ həmkarlar ittifaqı konfederasiyasının rəhbəri Afiyəddin Məmmədov sentyabrın 20-də öz evinin qarşısında naməlum şəxsin hücumuna məruz qaldıqdan sonra saxlanılıb. Məmmədov ona hücum edən şəxsə bıçaq xəsarəti yetirməkdə (CM-in 221-3 - xuliqanlıq, silahdan istifadə ilə törədildikdə və 126.1-ci - qəsdən sağlamlığa ağır zərər vurma maddələri) ittiham olunub.

Sonradan 126.2.4-cü (ümumi təhlükəli üsulla qəsdən sağlamlığa ağır zərər vurma) və 228.4-cü (qanunsuz silah dövriyyəsi) maddələrlə daha ağır ittihamlar irəli sürülüb. Onu 11 ilədək həbs cəzası gözləyir. Hüquq müdafiəçiləri Məmmədovu siyasi məhbus kimi tanıyıblar.

Məmmədovun həmkarları onun kuryerlərin hüquqlarını fəal şəkildə müdafiə etdiyinə görə cəzalandırıldığı qənaətindədirlər.