Prokuror  Hüseyn Abdullayevin 10 il azadlıqdan məhrum edilməsini istəyib

Cümə axşamı keçmiş deputat və sahibkar Hüseyn Abdullayevin işi üzrə məhkəmə prosesində prokuror yekun söz ilə çıxış edib.

Abdullayev səhhətində ciddi problemlər olduğu üçün istintaq təcridxanasından prosesə videobağlantı ilə qoşulub.

Dövlət ittihamçısı Abdullayevin 10 il müddətinə azadlıqdan məhrum olunmasını istəyib.

Müdafiə tərəfi yekun çıxışa hazırlaşmaq üçün vaxt istəyib, növbəti iclas dekabrın 19-na təyin edilib,  Turan-a vəkil Günay İsmayılova bildirib.

Onun sözlərinə görə, Abdullayevin səhhətində problemlər ağırlaşır, o sürətlə arıqlayır.

* Hüseyn Abdullayev 90-cı illərdə neft məhsulları biznesində aparıcı mövqe tutub. Onun nəzarətində olan dəstələr müxalifətin etiraz aksiyalarının dağıdılmasında iştirak edib.

2013-cü ildə Azərbaycandan mühacirət edib. Bir müddət sonra onun barəsində vergidən yayınma maddəsilə cinayət işi açılıb. Abdullayev 2018-ci il aprelin 22-də Almaniyadan Türkiyəyə gedib və orada saxlanılaraq Azərbaycana ekstradisiya edilib.

O, qanunsuz sahibkarlıq, dələduzluq, qəsb və 6 il həbs cəzasına məhkum edilib.

6 illik həbs cəzasının başa çatmasına 47 gün qalmış, bu il martın əvvəlində ona qarşı yeni ittiham irəli sürülüb. Hazırda Abdullayev cinayət yolu ilə əldə edilmiş pulların leqallaşmasında (Cinayət Məcəlləsinin 193-1.3.2-ci maddəsi) ittiham olunur. Əsasən 2006-2014-cü illərdə 6 milyon manatın yuyulmasında ittiham olunur. Halbuki, istintaq onun 2000-ci ildən 2018-ci ilə qədərki əməllərini araşdırıb. Hüseyn Abdullayev ittihamları rədd edir.