Prokuror livanlı muzdlunun 20 il azadlıqdan məhrum edilməsini istəyib /YENİLƏNİB/

Bakı/08.06.21/Turan:  Eulcekciyanın işi üzrə prosesdə onunla birlikdə yaşayan Maral Nazaryanın videoya çəkilmiş şahid ifadələri dinlənilib.  Onlar birlikdə saxlanılıblar, lakin sonradan qadın azad edilib. O danışıb ki,  Eulcekciyanla birlikdə vaxtaşırı Ermənistana gediblər. Son dəfə pandemiyaya görə Livana gedə bilməyiblər. Qarabağda müharibə başlayanda birlikdə Şuşaya gəliblər.

Hovak adlı Livan vətəndaşı ayda 2000-2500 dollara və əlavə maaşa  Eulcekciyana müharibədə döyüşməyi təklif edib. Nazaryanın sözlərinə görə, o, bunun əleyhinə olub, lakin Eulcekciyan razılaşıb və döyüşə gedib. O, Nazaryana xəbər verib ki, Xocavənd istiqamətində yerləşir və orada onları müasir silahlarla, forma ilə təmin ediblər.

Ancaq bir neçə gündən sonra Eulcekciyan cəbhədən qaçıb və bildirib ki, "azərbaycanlılar çox güclüdür", xaricdən gələn bütün muzdlular həlak olublar. Bundan sonra cütlük Laçına gedib. Noyabrın 10-da eşidiblər ki, müharibə bitib. Əşyalarını götürmək üçün Şuşaya gəliblər, lakin azərbaycanlı hərbçilər onları saxlayıblar.

Lakin təqsirləndirilən şəxs qadının ifadəsini inkar edib. Onun versiyasına görə, erməni hərbçilər onu zorla Qarabağa döyüşməyə göndəriblər. O, Xocavənd istiqamətində olduğunu etiraf etsə də, silah işlətməsini inkar edib.

Eulcekçiyanın telefonundakı fotokadrlara (səngərdə minaatanı hazırlıq vəziyyətinə gətirir), eləcə də silahlı muzdlularla çəkilmiş digər foto və videoyazılara gəlincə,  müttəhim deyib ki, sosial şəbəkələrdə özünü göstərmək üçün çəkilib.

Sonra məhkəmə istintaqının başa çatdığı elan edilib və baş prokuror çıxış edib. O, müttəhimin 20 il müddətinə azadlıqdan məhrum edilməsini istəyib. Növbəti məhkəmə iclası iyunun 11-nə təyin olunub edilib. —06D-

*   *   *

2021 İyun 08 (Çərşənbə axşamı) 14:08:39

Azərbaycanda Livandan olan muzdlunun məhkəməsi başlayıb

Bakı/08.06.21/Turan:  İyunun 8-də Bakının Yasamal Rayon Məhkəməsində Qarabağda muzdlu kimi döyüşdüyü bildirilən livanlı Eulcekcian Viken Abrahamın işi üzrə məhkəmə iclası başlayıb. Prosesə hakim Elbəy Allahverdiyev sədrlik edir. Bugünki iclasda dövlət ittihamçısı ittiham aktını elan edib.

Azərbaycan Baş Prokurorluğu və Dövlət Təhlükəsizliyi Xidmətinin birgə məlumatına əsasən, Livan vətəndaşı Eulcekcian Viken Abraham və digərlərinin maddi mükafat müqabilində muzdlu kimi mütəşəkkil dəstə halında birləşib Ermənistan Silahlı Qüvvələrinin tərkibində Azərbaycan vətəndaşlarına qarşı terrorçuluq fəaliyyətində iştirak etmələri faktı əsasında Azərbaycan  Dövlət Təhlükəsizliyi Xidmətinin İstintaq Baş İdarəsində Cinayət Məcəlləsinin müvafiq maddələri ilə başlanan cinayət işi üzrə istintaq yekunlaşdırılıb.

İstintaqla müəyyən edilib ki, Livan vətəndaşı, Beyrut şəhər sakini Eulcekcian Viken Abraham 29 sentyabr 2020-ci ildə Livan vətəndaşı Hovak Kikiyanın ilkin olaraq 2500 ABŞ dolları məbləğində maddi mükafat müqabilində muzdlu kimi Azərbaycanın işğal altında olmuş ərazilərində hərbi əməliyyatlarda iştirak etmək təklifini qəbul edib, bu məqsədlə həmin gün digər şəxslərlə mütəşəkkil dəstə halında qəsdən Ermənistan ərazisindən Azərbaycanın mühafizə olunan dövlət sərhəddini nəzarət-buraxılış məntəqələrindən kənarda keçib digər muzdluların da olduğu ərazilərə gəlib.

Həmçinin Viken Eulcekcian və maddi mükafat müqabilində muzdlu kimi döyüşən digər şəxslər Azərbaycanın qanunvericiliyi ilə nəzərdə tutulmayan silahlı birləşmələrin təkibində qanunsuz olaraq əldə etdikləri odlu silahlardan, döyüş sursatlarından və komplekt hissələrindən istifadə etməklə Azərbaycan vətəndaşları və ordusuna qarşı terrorçuluq fəaliyyətində iştirak ediblər.

Törətdiyi cinayət əməllərinə görə Viken Eulcekciana Azərbaycan Cinayət Məcəlləsinin 114.3-cü (muzdlunun hərbi münaqişədə və ya hərbi əməliyyatlarda iştirakı), 214.2.1-ci (terrorçuluq qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə), 318.2-ci (Azərbaycan Respublikasının dövlət sərhəddini qanunsuz olaraq keçmə) və digər maddələrilə ittiham irəli sürülüb və məhkəmənin qərarı ilə barəsində həbs qətimkan tədbiri seçilib.-03-