Qarabağ nizamlanmasında Rusiyadan çox şey asılıdır - Məmmədyarov

Rusiya Dağlıq Qarabağda vəziyyətin nizamlanması üzrə ciddi addımlar atır, bu barədə Azərbaycan XİN rəhbəri Elmar Məmmədyarov Moskvada Lavrovla görüşdən sonra keçirilən mətbuat konfransında bildirib.

"Rusiya çox ciddi addımlar atır, bu gün biz bunu ətraflı müzakirə etdik", deyə Məmmədyarov bildirib.

Azərbaycanda və Ermənistanda ictimaiyyət "başa düşməlidir ki, irəliyə doğru hərəkət etmək lazımdır".

"İstənilən halda, bu gün biz hansı istiqamətdə irəliləməli olduğumuzu ətraflı müzakirə edərkən mən Sergey Viktoroviçin əhvalını hiss etdim, az-çox hansısa perspektivlər var", deyə Məmmədyarov bildirib.

"İndiki halda hər şey təkcə Azərbaycandan deyil, ATƏT-in Minsk Qrupunun həmsədri kimi Rusiyadan da asılıdır. Əlbəttə, burada Ermənistan tərəfi də hazırda masada olan təklifləri qəbul etmək üçün böyük rol oynamalıdır", deyə nazir əlavə edib. -02D-

* * *

Azərbaycan Rusiyanın mühüm strateji tərəfdaşıdır, müasir dövrün əksər mühüm problemləri üzrə iki ölkənin mövqeləri üst-üstə düşür. Rusiya və Azərbaycan prezidentlərinin müntəzəm əlaqələri konkret istiqamətlərdə həlledici rol oynayır. Bu barədə RF XİN başçısı Sergey Lavrov bu gün Moskvada azərbaycanlı həmkarı Elmar Məmmədyarovla görüşdən sonra keçirilən mətbuat konfransında bildirib.

Qarabağ mövzusuna toxunan nazir deyib: "Təbii ki, biz Dağlıq Qarabağ nizamlanması haqqında danışdıq. Rusiya bundan sonra da həm Bakı və Yerevanla ikitərəfli münasibətləri çərçivəsində, həm də üçtərəfli - Rusiya, Azərbaycan və Ermənistan formatında görüşlərdə və əlbəttə ki, ATƏT-in Minsk Qrupunun həmsədri kimi tərəflər üçün məqbul olan həllərin axtarışına yardım edəcək.

Biz bütün addımları həmsədrlər - həmkarlarımız ABŞ və Fransa tərəfindən hazırlanan prinsipial yanaşmalar çərçivəsində atırıq. Ermənistan və Azərbaycan hələlik Qarabağ nizamlanmasının bir neçə mühüm aspekti üzrə razılığa gəlməkdə uzaqdır", deyə Lavrov bildirib.

"Biz Qarabağ münaqişəsinin nizamlanacağına ümid edirik. Uzun illər davam edən əlaqələrin nəticələri bunu göstərir, onların yekunlarına görə nizamlanacaq əsas məsələlər barəsində ümumi anlayış əldə etmək mümkün olub. Bu, həm təhlükəsizlik məsələləri, ilk növbədə humanitar məsələlər, hazırda Qarabağ ətrafında Azərbaycanın nəzarəti altında olmayan rayonların qaytarılması məsələləridir. Bu, həm də Dağlıq Qarabağın statusunun müəyyən edilməsidir - şübhəsiz, orada yaşayan insanlar nəzərə alınmaqla. Bu, həm də beynəlxalq sülhməramlı qüvvələrin parametrlərinin razılaşdırılmasıdır", deyə Lavrov qeyd edib. Bu aspektlərin əksəriyyəti üzrə "razılaşmamız var", deyə o, əlavə edib.

"Amma yekun paket üçün mühüm olan iki-üç konkret mövzu hələlik müzakirə olunmur. Yalan danışmayacağam, biz hələlik tərəflərin bu aspektlərə vahid yanaşma işləyib hazırlayacağı vəziyyətdən uzağıq", deyə Lavrov bildirib.

Daha sonra o qeyd edib ki, tərəflər Xəzər mövzusunu müzakirə ediblər. "Ümid edirik ki, Xəzəryanı ölkələrin XİN başçılarının qarşıda duran müşavirəsində Xəzər dənizinin hüquqi statusu haqqında Konvensiya üzərində işi yekunlaşdırmaq mümkün olacaq", deyə o qeyd edib. -02D-