Qarabağa getdikləri üçün Azərbaycana səfərləri qadağan olunmuş şəxslərin siyahısı açıqlanıb

Azərbaycan XİN ölkənin işğal edilmiş ərazilərinə qanunsuz səfər etmiş şəxslərin siyahısını açıqlayıb.

Siyahıya ümumilikdə 335 nəfərin adı daxildir. Onlar arasında Almaniya, Slovakiya, İran, Rusiya, Avstraliya, Avstriya, Fransa, Böyük Britaniya parlamentlərinin onlarla deputatı, Amerikalı senator var.

Siyahıda həmçinin müxtəlif ölkələrdən və beynəlxalq təşkilatlardan siyasətçilər, jurnalistlər, tələbələr, rəssamlar, artistlər və digər şəxslər var.

Onlar arasında Monserat Kabalye və Albano kimi məşhur müğənnilər də var. Siyasətçilərdən ən məşhurları Rusiyalı deputat Konstantin Zatulin, Avropa İttifaqının Cənubi Qafqazda keçmiş nümayəndəsi Piter Semnebi və başqaları var.

Siyahıda adı çəkilən şəxslər Azərbaycanın dövlət sərhədi haqqında qanunu pozduqları üçün “arzuolunmaz şəxs” elan olunublar və onların Azərbaycana səfərləri qadağan edilib.

Xatırladaq ki, rəsmi Bakı Qarabağa və ermənilər tərəfindən işğal edilmiş digər ərazilərə səfər etmək istəyən əcnəbilərin öz səfərlərini Azərbaycan hökuməti ilə razılaşdırmasını tələb edir.

Tam siyahı ilə aşağıdakı ünvanda tanış olmaq olar:

http://mfa.gov.az/files/file/Arzuolunmaz%20Shexslerin%20Siyahisi-2013.pdf . -02В-