Qazaxıstana hökumət nümayəndə heyəti və istintaq qrupu göndərilib

Aktau yaxınlığında AZAL-a məxsus sərnişin təyyarəsinin qəzaya uğramasından sonra Qazaxıstana hökumət nümayəndə heyəti və istintaq qrupu göndərilib. Nümayəndə heyəti faciənin səbəblərini araşdırmaq məqsədilə Prezident İlham Əliyevin tapşırığı ilə göndərilib.

Nümayəndə heyətinə Rəqəmsal İnkişaf və Nəqliyyat naziri, Fövqəladə Hallar naziri, baş prokurorun müavinləri, səhiyyə nazirinin müavinləri, Dövlət Mülki Aviasiya Agentliyinin direktoru, AZAL-ın vitse-prezidenti və digər dövlət qurumlarının nümayəndələri daxildir.

Bundan əlavə, baş prokurorun müavini Elmar Camalovun rəhbərlik etdiyi istintaq qrupu da Qazaxıstana göndərilib.

Azərbaycan Baş Prokurorluğunda Azərbaycan Cinayət Məcəlləsinin 262.3-cü (hava nəqliyyatında hərəkət təhlükəsizliyi qaydalarının pozulması, iki və ya daha çox şəxsin ölümünə səbəb olma) və 314.3-cü (iki və ya daha çox şəxsin ölümünə səbəb olan səhlənkarlıq) maddələri ilə cinayət işi açılıb.