Qreta Tunberq Azərbaycan Xarici İşlər Nazirliyinin "qayğısını" qiymətləndirməyib

"Azərbaycan əhalisi tələdədir. Hava limanı olmadan başqa yolla ölkəyə giriş-çıxış edə bilmir. Hətta oraya getməli olsaydım belə, bunu etməzdim. Rejimi legitimləşdirmək istəmirəm”.  Bu barədə İsveçin təbiəti mühafizə sahəsində fəalı Qreta Tunberq “Blankspot” nəşrinə  müsahibəsində bildirib. O, Tbilisiyə gedib, oradan Ermənistana getmək niyyətindədir. COP29 iqlim sammitindən heç bir gözləntisi yoxdur.

"Bundan ortaya çıxacaq yeganə şey kağız üzərində yaxşı görünən simvolik qərarlardır. Biz bu ruhda davam edə bilmərik. Əsas insan hüquqlarına hörmət etməyən avtoritar dövlətlərə legitimlik verən konfrans olduğunu deyə bilmərik. Hər gün adamların repressiyalar və hüquq pozuntuları ilə üzləşdiyi ölkələrdə iqlim haqqında danışa bilmərik", - o deyir.

Fəal onun adından istifadə etmək cəhdlərini pisləyir. Ötən ilin yazında Azərbaycan Xarici İşlər Nazirliyi Qreta Tunberqə dəstək bəyanatı ilə çıxış etmişdi. O vaxt etirazlar zamanı Hollandiya polisi onu saxlamışdı və Azərbaycan iqlim fəallarına sərbəst nümayişlər keçirmək imkanı verilməsinin vacibliyini bildirmişdi.

"Avtoritar rejimin öz  insan hüquqları pozuntularına haqq qazandırmaq üçün məndən bəhanə kimi istifadə etməsi və mənimlə həmrəy olduğunu bəyan etməsi absurddur", - Tunberq qeyd edib və iqlim sammitlərinin avtoritar ölkələrdə keçirilməsini tənqid edib.

"Mən COP görüşlərini indiki şəkildə legitimləşdirə bilməyəcəyimizi vurğulamaq üçün buradayam. Son üç ildə görüşlər avtoritar rejimlərdə keçirilib və onların belə yerlərdə keçirilməsi heç nəyə gətirib çıxarmır", - o qeyd edib.