Ramil Usubov yerini Vladimir Kolokolsevə güzəştə getməyəcək

 MDB DİN rəhbərləri Şurasına Ermənistanın istədiyi kimi, rusiyalı nazir deyil, Azərbaycanın daxili işlər naziri rəhbərlik edəcək.  Bu barədə MDB ölkələri ərazisində mütəşəkkil cinayətkarlığın və cinayətin digər təhlükəli növlərinə qarşı mübarizənin koordinasiyası üzrə Bürodakı mənbə bildirib. Məlumatı RİA “Novosti” yayıb.

Mənbənin sözlərinə görə, bu səlahiyyətlərin erməni tərəfdən Rusiyaya verilməsinin hüquqi əsası yoxdur.

Xəbər verildiyi kimi, bazar ertəsi Ermənistan polisi Şuranın sentyabrın 6-7-də Bakıda keçirilən iclasının iştirakçılarına məktub göndərərək azərbaycanlı zabit Ramil Səfərovun Macarıstandan ekstradisiya edilməsinə və sonradan əhv olunmasına etirazını bildirib və görüşdə iştirakdan imtina etdiyini bəyan edib. Qurumun mətbuat xidmətinin məlumatına görə, Ermənistanın polis rəisi Şuranın sədri kimi öz səlahiyyətlərini Rusiyanın daxili işlər nazirinə verir.

“MDB ölkələri DİN rəhbərləri Şurasının reqlamentinə görə, Şuranın rəhbərinin səlahiyyətlərinin verilməsi latın əlifbası üzrə rotasiya qaydasında həyata keçirilir. Beləliklə, Ermənistandan sonra təşkilatda sədrlik Azərbaycana keçir”, - mənbə bildirib.

O həmçinin qeyd edib ki, “səlahiyyətlərin verilməsi yalnız Şuranın iclasında mümkündür, başqa  format nəzərdə tutulmayıb”. Odur ki, Ermənistan polis rəhbərinin səlahiyyətlərin RF daxili işlər nazirinə verilməsi barədə qərarı Şuranın reqlamentinə uyğun deyil və çətin ki hə hansı hüquqi nəticələrə səbəb olsun”, - mənbə qeyd edib.

Onun məlumatına görə, iclasda Ermənistan polis nümayəndəsinin olmamasına görə Şuranın işinə dair hesabatla MDB ölkələri ərazisində mütəşəkkil cinayətkarlığın və cinayətin digər təhlükəli növlərinə qarşı mübarizənin koordinasiyası üzrə Büronun direktoru, general-polkovnik Nikolay Ovçinnikov çıxış edəcək.—0—