Bakı/15.11.17/Turan: Respublikaçı Alternativ (REAL) Hərəkatı qurultay keçirməyə yer ayrılmasından ötrü növbəti dəfə əlaqəli qurumlara müraciət edib. Bu dəfə müraciət Bakı şəhər İcra Hakimiyyəti (BŞİH) ilə yanaşı qurultayın keçirilməsi üçün texniki imkanları olan otellərə də ünvanlanıb.
Bu haqda hərəkatın məlumatında yazılır.
Məlumata görə, müraciət Respublikaçı Alternativ Partiyası təşəbbüs qrupu adından göndərilib.
Bu dəfə qurultay keçirilməsi üçün 7 qurumdan yer ayırması istənilir.
Bakı Şəhər İcra Hakimiyyətindən başqa təsis qurultayının keçirilməsi üçün Azərbaycan Dövlət Opera və Balet Teatrına, Beynəlxalq Mətbuat Mərkəzinə, "Pullman Baku", "Park Inn", "Hyatt Regency" və "The Landmark Baku" otellərinə də müraciət edilib.
Müraciətdə bildirilir ki, qurultay ilin sonunadək şənbə və ya bazar günləri keçirilə bilər. Bunun üçün azı 400 nəfərlik məkanın ayrılmasına ehtiyac var.
Bu, REAL-ın qurultaya yer ayrılması ilə bağlı ilk müraciəti deyil. Daha əvvəl 3 dəfə BŞİH-ə müraciət olunub.
REAL Hərəkatı bu il oktyabrın 29-da qurultay keçirmək niyyətində idi. Qurultayda hərəkatın partiyaya çevriləcəyi gözlənirdi. Bu qərar sentyabrın 24-də hərəkatın rayonlardan və Bakıdan gələn təmsilçilərinin iştirakı ilə qəbul edilmişdi. Həmin qərardan sonra Təşəbbüs Qrupu qurultaya yer ayrılmasından ötrü Bakı Şəhər İcra Hakimiyyətinə müraciət etmişdi. Müraciət Bakı Şəhər İcra Hakimiyyəti Mədəniyyət və Turizm Baş İdarəsinə göndərilmişdi.
Ancaq Bakı Şəhər Mədəniyyət və Turizm Baş İdarəsi Respublikaçı Alternativ Partiyası Təşəbbüs Qrupunun təsis qurultayı keçirməkdən ötrü yer ayrılması xahişi ilə müraciətinə müsbət cavab verməmişdi. Cavabda onların məktubda qeyd etdikləri məkanda tədbirin keçirilməsi mümkün sayılmamışdı. Hərəkat sonrakı müraciətlərdə də istəyinə nail ola bilməmişdi.
REAL Hərəkatı 2009-cu ildə təsis edilib. Hərəkat respublikaçılıq ideyalarını üstün tutur.
Hərəkatın sədri İlqar Məmmədov 2013-cü ilin yanvarında İsmayıllı hadisələri ilə bağlı həbsə alınıb. O, kütləvi iğtişaşların təşkilində ittiham edilərək, məhkəmənin qərarı ilə 7 il azadlıqdan məhrum edilib. Avropa İnsan Hüquqları Məhkəməsi onun həbsdən azad olunması ilə bağlı qərar verib. Ancaq o, hələ ki, azadlığa buraxılmayıb.
Siyasət
-
İnsan Hüquqları Müdafiəçilərinin Müdafiəsi Rəsədxanası (OPHRD) azərbaycanlı hüquq müdafiəçisi Rüfət Səfərovun həbsini pisləyib və ona qarşı ittihamların dərhal ləğv edilərək sərbəst buraxılmasına çağırıb.
-
Dekabrın 21-də Müsavat Partiyasının qərargahında mərhum ictimai fəal Nərgiz Yaqublunun adına təsis olunmuş mükafatın təqdimatı keçirilib. Mükafat hazırda həbsdə olan "III Respublika Platforması"nın (Resplatforma) spikeri Akif Qurbanova təqdim olunub. Müsavat Partiyasının başqanı İsa Qəmbər Qurbanovun Azərbaycanda demokratik, cümhuriyyət dəyərlərinin bərqərar olması uğrunda apardığı ardıcıl mübarizəyə görə bu mükafata layiq olduğunu deyib.
-
Dövlət Departamentinin sözçüsü TURANa bildirib ki, Birləşmiş Ştatlar Gürcüstanda demokratiyanı sarsıtmaqda günahkar olan daha on məmura viza qadağası qoyacaq və bununla da onların ümumi sayı 100-dən çox olacaq.
-
Azərbaycan prezidenti İlham Əliyev Almaniyanın Maqdeburq şəhərində baş vermiş faciəli hadisə ilə əlaqədar prezident Frank-Valter Ştaynmayerə başsağlığı verib.
Rəy yaz