Rəsmi Bakı şəxsi borcunu xalq sərvəti hesabına qaytarmaq niyyətindədir

İctimai Palata çərşənbə günü Müsavat Partiyasının qərargahında “Kojennı qalmaqalı” ilə bağlı dinləmələr keçirib.

Xalq Cəbhəsinin sədri Əli Kərimli 10-15 il tarixi olan bu fırıldağın mahiyyətini yada salıb. Əslən çex olan iş adamı Viktor Kojennı Bakıya səfərlərində Azərbaycanın dövlət rəhbərləri, Dövlət Neft Şirkətinin rəhbərliyi ilə görüşür. Xarici iş adamları və siyasi xadimlərlə görüşlərində Azərbaycanın ARDNŞ-i özəlləşdirmək niyyətində olduğunu, yaxşı pul qazanmaq fürsəti yarandığını bildirir. Bu özəlləşmədə aparıcı paya sahib olmaq üçün ətrafına sərmayə sahiblərini yığır, pul toplayır. Sonra məlum olur ki, bu sahə özəlləşdirilmir. Zərərçəkənlər zərərə düşdüklərinə görə Nyu-York şəhər Cənub məhkəməsinə müraciət edirlər. Bu məsələ ilə bağlı V.Kojennı istintaqa cəlb edilir. İstintaq müəyyən edir ki, V.Kojennı özəlləşdirmə haqda vədləri boş yerə verməyib. Bakıya səfərlərində yüksək rütbəli dövlət adamları ilə görüşüb. Dövlət neft şirkətinin rəhbərliyinə milyonlarla rüşvətlər verilib. İstintaq o zamankı dövlət başçısı Heydər Əliyevə 83 milyon dollar verildiyini təsbit edib. Bu məsələyə görə Kojennı 21 ay həbsdə yatıb. Bütünlükdə isə zərəçəkənlərə dəyən ziyanın məbləği 300 milyon dollardır. 

Bu məsələnin yenidən gündəmə gəlməsinə səbəb kimi dövlət başçısı İlham Əliyevin bir açıqlaması göstərilib. İ.Əliyev bu fırıldaqdan zərər çəkənlərə Azərbaycanın 150 miylon manat ödəməyə hazır olduğu, bu məbləği ödəmək üçün dövlət mülkiyyətinin müəyyən hissəsinin satılmasının lazımlığı bəyanatı səsləndirib. Bu bəyanat ABŞ mətbuatında əksini tapıb. Ə.Kərimli dövlət mülkiyyətinin satılması yolu ilə zərərin ödənməsini “iqtidarın xalqın sərvəti hesabına borc ödəməsi” kimi dəyərləndirib. “Düzdür, bu gün ölkədə ədalətli istintaq, məhkəmə yoxdur, amma bu adamlar bir gün bu əməllərinə görə cavab verəcəklərini unutmamalıdırlar”, deyə Ə.Kərimli dinləmənin mahiyyətinə toxunub. 

Müsavat Partiyası başqanı İsa Qəmbər deyib ki, rəsmi Bakı V.Kojennı qalmaqalında ünvanına deyilənləri böhtan, yalan sayırdı. “İndi 150 miyon dollar zərəri ödəməyə hazır olması haqda bəyanat rəsmi Bakının ünvanına deyilənləri qəbul etməsinin sübutudur”, - deyə Müsavat başqanı qeyd edib. 

Hüquqşünas Vidadi Mirkamal İ.Əliyevin bu borcu ödəməyə hazır olmasının özünü də cinayət kimi dəyərləndirib. Onun fikrincə bu borcu mərhum dövlət başçısı Heydər Əliyev öz şəxsi varidatı hesabına qaytarmalı idi. V.Mirkamal indi İ.Əliyevin bu borcu xalqın hesabına ödəmək istəməsini də cinayət sayıb.

Eyni zamanda, natiqlər bu məsələdə rəsmi Bakının cinayət işindən kənarda qalmasını məqbul saymayıblar. Bu iqtidarı ancaq hakimiyyətdən getdikdən sonra cinayətə cəlb etməyin mümkünlüyü vurğualanıb. -05C-