Respublika Günündə Qarabağ probleminin həllinin və qeyri-neft sektorunun inkişafının prioritet olduğu açıqlanıb

  Çərşənbə günü “Buta” sarayında Respublika Günü münasibətilə rəsmi qəbul keçirilib.

“Azərbaycan Xalq Cümhuriyyətinin yaradılması dünya miqyaslı tarixi hadisə idi. Çünki müsəlman aləmində ilk demokratik respublika yaradılmışdı. Biz fəxr edirik ki, bu tarixi Azərbaycan xalqı yazıb”, - prezident İlham Əliyev zala müraciət edib.

Dövlət başçısı AXC-nin qurulması, sovet dönəmi və Azərbaycanın müasir inkişafı arasında paralellər apararaq Ermənistana qarşı “güzəşt” siyasətini yalnış adlandırıb. Bu, bütün inkişaf mərhələlərində və “dinc yanaşı yaşama” naminə həyata keçirilib. Lakin sonda bu cür siyasət 20-ci əsrin əvvəllərində Yerevan əyalətinin  və ötən əsrin sonlarında Azərbaycan Respublikası ərazisinin 20% itirilməsinə gətirib çıxarıb.

Bununla yanaşı İ.Əliyev hesab edir ki, müasir Azərbaycan bütün sahələrdə düzgün inkişaf edir. Daxili sabitlik, dünya böhranı və qeyri-sabitlik şəraitində  ölkənin regional önəmi bundan xəbər verir.

Perspektivlərdən danışan dövlət başçısı demokratiyanın inkişafı, hüquqi dövlət quruculuğu, söz azadlığı, dini, etniklərarası münasibətlərin hormonlaşdırılması, korrupsiyaya qarşı mübarizənin, dövlət idarəetmə sistemində nəzarətin gücləndirilməsi, daxili təhlükəsizliyin xarici təhdidlərdən müdafiəsi, beynəlxalq siyasətdə ikitərəfli münasibətlər formatının inkişafı, islam aləmində əlaqələrin möhkəmləndirilməsi, multikulturizm siyasətinin aparılmasını əsas vəzifə kimi göstərib.

O, prioritetlər sırasında Qarabağ probleminin Azərbaycanın ərazi bütövlüyü çərçivəsində mərhələli həllini və qeyri-neft sektorunun inkişafını qeyd edib.

“Əslində qarşıda duran vəzifələr daha da çoxdur, bir çıxışda onların hamısını qeyd etmək mümkün deyil. Sadəcə olaraq, bəziləri haqqında fikirlərimi bildirdim. Həm söylədiyim sözlər, həm aparılan təhlil, həm gələcəyə olan baxışlarımız bir daha bizi əmin edir ki, Azərbaycanın inkişafı davamlı olacaq”, - dövlət başçısı vurğulayıb. —0-