R.İbrahimbəyov Milli Şuradakı həmkarlarından dəstək gözləyir

Prezidentliyə namizədliyi irəli sürülmüş Demokratik Qüvvələrin Milli Şurasının (DQMŞ) sədri Rüstəm İbrahimbəyov bu orqanın üzvlərinə Azərbaycan MSK tərəfindən qeydiyyatı məsələsində israrlı davranmaq çağırışı ilə müraciət göndərib.

Bununla əlaqədar İbrahimbəyov özü də prezidentliyə namizəd üçün qanunvericiliyin tələblərinə riayət olunması üzrə zəruri addımları atır. Xüsusən, bu, SSRİ dövründən qalan Rusiya vətəndaşlığından imtina ilə bağlıdır.

“Milli Şura və Azərbaycanın demokratik ictimaiyyəti maksimum iradə və qətiyyət göstərməlidir ki, vahid namizəd qeydiyyata alınsın. Əslində, bu namizədin qeydiyyatına mane olmaq üçün heç bir qanuni əsas yoxdur və ümid edirəm ki, olmayacaq da. Hətta imtina ehtimalı olduğu variantda belə, gerçək demokratik düşərgədən  ikinci namizəd olmamalı, Milli Şura isə hakimiyyətin özbaşınalığı ilə aktiv mübarizəni davam etdirməli, onu Azərbaycan xalqının iradəsi, ölkə Konstitusiyası və götürdüyü beynəlxalq öhdəliklərlə hesablaşmağa məcbur etməlidir”, deyə İbrahimbəyov yazır.

O hesab edir ki, “bu yanaşma daha məqsədəuyğundur və seçkilərdə qələbəyə nail olmağın bəlkə də yeganə düzgün yoludur”.

Qeyd edək ki, Milli Şuraya daxil olan müxalifətdən Klassik Xalq Cəbhəsi Partiyasının lideri Mirmahmud Mirəlioğlu və Müsavat Partiyasının lideri İsa Qəmbər namizədliyini irəli sürüb. -06D-