Rövşanə Rəhimova - "Güc portretləri - 2024" fotosərgisinin siması

Norveç İnsan Hüquqları Fondu Evi insan hüquqları üzrə azərbaycanlı vəkil Rövşanə Rəhimovanı "Güc portretləri - 2024" fotosərgisinin qəhrəmanlarından biri seçib.

"Rövşanə Rəhimova Azərbaycanda insan hüquqları üzrə vəkildir. O, 10 ildən çoxdur insan hüquqlarının müdafiəsi ilə məşğul olur, qadın hüquqlarına və məişət zorakılığına qarşı mübarizəyə, o cümlədən qurbanların müdafiəsinə və ictimai vəkilliyə xüsusi diqqət yetirir. Azərbaycan Vəkillər Kollegiyasının üzvü olan Rəhimova həmçinin bir neçə siyasi məhbusun işi üzərində işləyir", deyə bu hüquq müdafiə təşkilatının saytında yer alan nəşrdə bildirilir.

Rəhimova sayta müsahibəsində Azərbaycanda insan hüquqları sahəsində vəziyyətin pisləşdiyini qeyd edir. "Heç kim üçün sirr deyil ki, Azərbaycanda insan hüquqları sahəsində vəziyyət xeyli pisləşir. Son illər müstəqil KİV-lərin jurnalistlərinin və hüquq müdafiəçilərinin həbslərindən bunu xüsusilə görürük", deyə Rəhimova qeyd edir.

Hazırda o, bir sıra siyasi məhbusun: hüquq müdafiəçisi və fəal Bəxtiyar Hacıyevin; iki gənc alim - İqbal Əbilov və Fazil Qasımovun; iqtisadçı və siyasətçi Qubad İbadoğlunun; Abzas Media-nın jurnalisti Nərgiz Absalamovanın və Toplum TV-nin işi üzrə həbs olunmuş fəal İlkin Əmrahovun hüquqlarını müdafiə edir.

İnsan Hüquqları Evləri Fondu "Güc portretləri: insan hüquqlarını müdafiə edən qadınlar" fotosərgisi vasitəsilə müstəqil qadın hüquq müdafiəçilərini və onların işini tərifləməyə və təşviq etməyə, həmçinin insan hüquqları sahəsində vəziyyəti işıqlandırmağa çalışır.