Rüfət Muradlı Kanal-13 rəhbərinin işi çərçivəsində dindirilib

Bakı/03.01.23/Turan: Kanal-13 internet televiziyasının əməkdaşı Rüfət Muradlı inzibati həbsdə olarkən bu Youtube layihəsinin rəhbəri Əziz Orucovun işi üzrə dindirilib.

Muradlı dekabrın 2-də saxlanılıb. Elə həmin gün məhkəmə onu İnzibati Xətalar Məcəlləsinin 510-cu (kiçik xuliqanlıq) və 535.1-ci (polisə tabe olmama) maddəsi ilə 30 gün müddətinə həbs edib.

"Məni maşından düşdükdən 30 saniyə sonra saxladılar, heç maşından uzaqlaşa bilmədim. Azərbaycan məhkəmələrinin mənim haqqımda qərarları ədalətsiz və absurd olub", deyə Muradlı Turan-ın müxbirinə bildirib. Jurnalist qeyd edib ki, Strasburq məhkəməsinə şikayət verəcək.

Muradlı həbsini jurnalist və siyasi fəaliyyəti ilə əlaqələndirib. O, həbsi zamanı Kanal-13-ün rəhbəri Əziz Oruclunun işi üzrə şahid kimi dindirilib.

Xatırladaq ki, Əziz Orucov noyabrın 28-də özbaşına tikinti həyata keçirmək ittihamı ilə həbs edilib, lakin dekabrın 19-da ona qarşı Azərbaycan CM-in 206.3.2-ci maddəsi (qaçaqmalçılıq, əvvəlcədən əlbir olan bir qrup şəxs tərəfindən törədildikdə) ilə ittiham irəli sürülüb.

Dekabrın 27-də məlum olub ki, məhkəmə Kanal-13-ün frilanser jurnalisti Şamo Eminovu həbs edib. Əziz Orucov kimi o da qaçaqmalçılıqda ittiham olunub. 03B06