Rusiya amerikalı jurnalist Alsu Kurmaşevanın həbs müddətini uzadıb

Cümə axşamı Dövlət Departamenti bildirib ki, Rusiyada jurnalist Alsu Kurmaşevanın həbs müddətinin uzadıldığını bilir və əvvəlki kimi bu məsələdən "dərin narahatlıq" hissi keçirir.

Cümə axşamı Kazanda məhkəmə Azadlıq Radiosu-nun jurnalistinin həbs müddətini aprelin 5-nə qədər uzadıb. O, oktyabrın 18-dən etibarən Rusiyada həbsdədir. "Bizim ABŞ vətəndaşlarının təhlükəsizliyindən daha yüksək prioritetimiz yoxdur", deyə Miller Turan-ın müxbirinə bildirib.

O, həmçinin əlavə edib ki, Rusiya hökumətinin tətbiq etdiyi məhdudiyyətlərlə əlaqədar ABŞ-ın Moskvadakı səfirliyinin əməkdaşları Kazanda Kurmaşevanın işi üzrə dinləmələrdə iştirak edə bilməyib.  

"Biz konsulun Kurmaşeva ilə əəlaqə saxlamasını gözləməkdə davam edirik və Rusiyanın bütün ABŞ vətəndaşlarına ardıcıl və vaxtlı-vaxtında konsulla əlaqə imkanı yaratmasında israr edirik", deyə o bildirib.

Aİ-nin bir neçə hökuməti sonuncu dinləmələrdə iştirak etmək üçün Kazana nümayəndələrini göndərməyə müvəffəq olub.

"Alsu Kurmaşeva öz seçimi ilə Amerika vətəndaşıdır. O, bu vətəndaşlığın verdiyi azadlıqlarla əlaqədar ABŞ vətəndaşı olmağa qərar verib. İndi onun onsuz da sərt olan həbs müddəti daha iki ay uzadılıb", deyə Vaşinqton Milli Mətbuat Klubunun prezidenti Emili Uilkins və Milli Mətbuat Klubunun Jurnalistika İnstitutunun prezidenti Gil Klyayn birgə bəyanatlarında bildiriblər.