Rusiya Azərbaycana müəyyən edilmiş şərt və normalara uyğun olmayan silahlar satır – Məmmədyarov

Azərbaycan Rusiya ilə hərbi sahədə əməkdaşlığı davam etdirməyə hazırdır, Moskva və Bakı arasında Rusiya silahlarının alınması barədə müqavilələr üzrə həll olunmamış maliyyə məsələlərinin mövcud olduğu haqqında məlumat isə həqiqətə uyğun deyil. Bu barədə Moskvanın “Kommersant” qəzetinə müsahibəsində Azərbaycan XİN rəhbəri Elmar Məmmədyarov bildirib.

“Ödənişlərlə bağlı heç bir problem yoxdur, Rusiya və Azərbaycan arasında bununla bağlı həll olunmamış maliyyə məsələlərinin olduğu haqqında məlumat doğru deyil. Biz müqavilələrə uyğun olaraq bütün ödənişləri edirik. Onların icrasında problemlər var: bu mənada ki, Azərbaycana daxil olan silahlar müqavilələrdə əksini tapmış texniki parametrlərə uyğun olmalıdır. Dmitri Roqozin bu parametrlərlə bağlı problemlərin nədən ibarət olduğunu anlamaq üçün Bakıya gəlmişdi, tam izahat aldı, problem qalmadı”, deyə azir Dmitri Roqozinin bu yaxınlarda Bakıya səfərini şərh edərkən bildirib.

“Sövdələşmələrin həyata keçirilməsi müddəti ilə bağlı hər şey plana uyğun gedir. Məsələ ondadır ki, bəzi konkret silah növlərinin texniki parametrləri düzəldilməlidir. Və bu, Dmitri Roqozinin sözlərinə görə, yaxın gələcəkdə ediləcək”, deyə nazir əlavə edib.

Bakının Ermənistana silah nəqli barədə notası ilə bağlı suala cavabda Məmmədyarov deyib ki, notanın məzmunu ondan ibarət idi ki, Ermənistana satılan silahlar Azərbaycanın işğal edilmiş ərazilərinə keçməməlidir.

“Son istehlakçı Ermənistan olsaydı, məsələ Moskva və Yerevan arasında ikitərəfli münasibətlər çərçivəsini aşmazdı. Silahlar Azərbaycanın işğal edilmiş ərazilərinə keçdikdə isə məsələ başqadır”.

“Rusiyanın Azərbaycanın ərazi bütövlüyünü və suverenliyini tanıdığını nəzərə alsaq, işğal edilmiş ərazilərdə Rusiya silahlarının olmasında qətiyyən məntiq yoxdur. Moskvanın sonrakı bəyanatlarından göründüyü kimi, Rusiya XİN-də bizim təqdim etdiyimiz sənədin tonunu doğru dərk ediblər”, Məmmədyarov belə hesab edir. -02D-